İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 876 Hüküm no: 1199 Orijinal metin no: [127a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. İsmail’in Ahmed b. Ebubekir’de olan alacağını tecil ettiği Mahrûse-i Galata a‘mâlinden kasaba-i Tophâne’de Kılıç Ali Paşa mahallesinde sâkin İbrahim Efendi b. İsmail meclis-i şer‘-i hatîrde mahrûse-i Üsküdar’a tâbi‘ Karamürsel nâm kasaba sükkânından Ahmed b. Ebûbekir mahzarında ikrâr ve i‘tirâf edip târih-i kitâbdan yirmi ay mukaddem bi fazlillâhi te‘âlâ hâsıl olan fâ’ide beynimizde münâsafaten olmak vechi üzre kasaba-i mezbûrede ve civârında olan kurâda yapağı iştirâ edip evvel-i bahârda vilâyet-i Anadolu’da Tosya nâm kasabaya götürüp bey‘ edip âhar diyâra götürüp bey‘ etmemek için mezkûr Ahmed’e alâ tarîki’l-mudârebe kırk yedi bin dört yüz doksan akçe def‘ ve teslîm ol dahi ba‘de’l-kabz yapağı iştirâ edip vech-i muharrer üzre ta‘yîn eylediğim Tosya kasabasına varmayıp nehy eylediğime muhâlif medîne-i İzmir’e varıp bey‘ edip geldikde re’s-i mal olan meblağ-ı mezbûr kırk yedi bin dört yüz doksan akçeden ancak bana on sekiz bin akçe vermekle, bâkī kalan yirmi dokuz bin dört yüz doksan akçeyi mezbûr Ahmed’den taleb ve da‘vâ eylediğimde beynimizde münâza‘ât-ı kesîre cereyânından sonra vesâtat-ı muslihîn ile meblağ-ı bâkī-i mezbûr yirmi dokuz bin dört yüz doksan akçe da‘vâsından mezkûr Ahmed beni on dokuz bin altı yüz akçe üzerine inşâ-i akd-i sulh eyledikde ben dahi sulh-ı mezbûru kabûl edip lâkin bedel-i sulh-ı mezbûru hâlâ edâya iktidârı olmayıp istîcâl etmeğin târih-i kitâbdan elli gün tamâmına değin te’cîl ol dahi ecel-i mezbûru kabûl eyledi ba‘de’l-yevm meblağ-ı müeccel-i mezkûr on dokuz bin altı yüz akçeden gayrı şirket ve mudârebe ve sâir husûslara müte‘allika olan cemî‘ da‘vâdan ve mütâlebât ve eymân ve muhâsamâtdan mezbûr Ahmed ile şerîki işbu Ömer b. Hasan’ı ibrâ-i âm ile ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî Cemâziyelevvel li sene erba‘a ve seb‘în ve elf. Şuhûdü’l-hâl: Mahmud Çavuş b. Mehmed, Nasûh Beşe Çukadar, Veli b. Mahmud, Şükrullah b. Mustafa ve gayruhüm.