İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 875 Hüküm no: 1198 Orijinal metin no: [127a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Abdünnebi’nin menzil satışı Husûs-ı âti’l-beyânın mahallinde tahrîr için bi’l-iltimâs kıbel-i şerî‘at-ı mergūbeden irsâl olunan Mevlânâ Mustafa Efendi zikri âtî menzile varıp zeyl-i rakīmde isimleri mastûr olan müslimîn huzûrlarında akd-i meclis-i şer‘-i hatîr eyledikde mahmiye-i İstanbul’da Çıkrıkçı Kemal mahallesinde sâkine olup umdetü’l-müderrisîni’l-kirâm Resûl Efendi b. Musa ve Atâullah Çelebi b. Osman ma‘rifetleriyle mu‘arrefe olan umdetü’l-muhadderât zübdetü’l-muvakkarât Fâtıma Hâtun bt. Abdünnebî meclis-i ma‘kūd-ı mezbûrda, işbu kitâb-ı sıhhat-nisâb yed-i kerîmelerine vusûl ile şeref-yâb olup sâbıkan Sofya kadısı olan umdetü’l-ulemâ’i’l-izâm, zübdetü’l-fihâm Hasan Efendi b. Süleyman mahzarında ikrâr ve i‘tirâf edip zikri âtî bey‘in sudûruna değin mülk ve hakkım olup mahalle-i mezbûrede vâki‘ bir tarafı Süleyman Paşa menziline ve bir tarafı Beyzâde ( ) vakfına ve iki tarafı tarîk-i âma müntehî hâriciyyesi fevkānî üç oda ve bir sofa ve tahtapûş ve bir hamam ve bir kiler ve tahtânî üç oda ve bir kenîf ve altında bir ahır ve bir su kuyusunu ve mâ’-i cârî ve zât-ı eşcâr-ı müsmire ve gayr-ı müsmire bahçe ve dâhiliyyesi fevkānî iki oda ve iki sofa ve dehliz ve kenîf ve tahtında iki oda ve bir sofa ve bir matbah ve bir hamam ve sofa ve zât-ı eşcâr bahçe ve sofa ve havuz ve muhavvata ve havluyu müştemil işbu mülk menzilimin hâriciyyesini cemî‘ hudûd ve hukūk ve müştemilât-ı mezkûresiyle tarafeynden îcâb ve kabûlü [hâvî] bey‘-i bâtt-ı sahîh-i şer‘î ile yüz bin akçeye bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezkûr yüz bin akçeyi mezkûr Hasan Efendi yedinden tamânen ahz u kabz edip ba‘de’l-yevm işbu mülk menzilin hâriciyyesi cemî‘ müştemilâtı ile mezbûr Hasan Efendi’nin mülk-i müşterâsıdır hâriciyye-i mezbûrede ve semeninde vechen mine’l-vücûh ve sebebin mine’l-esbâb benim için hak ve alâka kalmadı, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde ba‘de’t-tahrîr, ma‘an ba‘s olunan Ali Beşe b. ( ) ve çukadar Nasûh Beşe b. Yusuf ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Hurrire fi’t-târihi’l-mezbûr li seneti’l-merkūme. Şuhûdü’l-hâl: Es-Sâbikūn.