İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 877 Hüküm no: 1201 Orijinal metin no: [127b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Timurhan bt. Abdullah’ın Süleyman b. Abdullah’dan muhâlaa yoluyla boşandığı Mahmiye-i İstanbul’da Harrât Kemal mahallesi sâkinelerinden Timurhan bt. Abdullah nâm hâtun meclis-i şer‘-i hatîr-i lâzımü’t-tevkīrde zevci Süleyman b. Abdullah nâm kimesne tarafından husûs-ı âtîye vekîl olup vekâleti Hasan Bey b. Abdullah ve Abdullah Çelebi b. Hasan nâm kimesneler şehâdetleri ile şer‘an vekâleti sâbite olan Mehmed b. Ali nâm kimesne mahzarında ikrâr ve takrîr-i kelâm edip zevcim mezbûr Süleyman zimmetinde mütekarrir ve ma‘kūdun-aleyh olan bin akçe mehr-i müeccelimin iki yüz seksen akçe hesâbınca bir altını vekîl-i mezbûr yedinden ahz u kabz edip mâ‘adâsı olan yedi yüz yirmi akçe ve nafaka-i iddet-i mu‘ayyene-i ma‘lûmem üzerine ve me’ûnet-i süknâm dahi kendi üzerime olmak üzre zevcim merkūm Süleyman ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan her birimiz âharı ibrâ-i âmm-ı kātı‘ü’n-nizâ‘ ile ibrâ eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: Hasan Beşe b. Abdullah, Mustafa Beşe eş-şehîr bi Altıkulaç, Nalçacı Mehmed Beşe b. ( ), Abdullah Çelebi b. Hüseyin, Şükrullah Bey b. Mustafa ve gayruhüm.