İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 878 Hüküm no: 1202 Orijinal metin no: [127b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın, küçük oğlu Abdülkadir için Ali Çebi b. Osman’ı vasî ve Hacı Osman b. Abdullah’ı nâzır tayin ettiği Mahmiye-i İstanbul’da Eski Mi‘mâr mahallesinde sâkin Mehmed b. Abdullah nâm kimesne meclis-i şer‘-i hatîrde işbu bâ‘isetü’l-vesîka Ali Çelebi b. Osman ve el-Hâc Osman b. Emrullah mahzarında takrîr-i kelâm edip bi emrillâhi te‘âlâ vefât eylediğimde sulbî sagīr oğlum Abdülkādir’in tesviye-i umûruna mezbûr Ali Çelebi’yi vasiyy-i muhtâr ve mezbûr el-Hâc Osman’ı vasiyy-i mezbûr Ali Çelebi üzerine hasbî nâzır nasb ve ta‘yîn eyledim dedikde mezbûr Ali Çelebi vesâyet-i mezbûreyi ve mezkûr el-Hâc Osman nezâret-i mesfûreyi kabûl ve hizmet-i lâzımelerin her biri edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cemâziyelevvel sene erba‘a ve seb‘în ve elf. Şuhûdü’l-hâl: İbrahim Halîfe b. Halil el-Müezzin, Mustafa b. Sinan, Hüseyin Çelebi b. Mustafa, Abdurrahman b. Ahmed, İslâm Halîfe b. Osman ve gayruhüm.