İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 879 Hüküm no: 1204 Orijinal metin no: [127b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Çelebi b. Ahmed’in küçük kızı Fâtıma için Ahmed Çelebi b. Bâli Efendi’nin vasî tayin olunduğu Dârü’l-hilâfeti’l-aliyye Kostantıniyye el-mahmiyye mahallâtından Kâtib Hüsrev mahallesi sükkânından olup bundan akdem tarîk-i hâcda vefât eden Mustafa Çelebi b. Ahmed’in sulbiye kızı Fâtıma nâm sagīreye bi hasebi’l-irsi’ş-şer‘î isâbet ve intikāl eden emvâlini zabta ve ahvâlini hıfza vasîsi olmayıp bir vasî nasb ve ta‘yîn olunmak lâzım ve mühim ve işbu râfi‘ü’l-kitâb Ahmed Çelebi b. Bâli Efendi sâlih ve mütedeyyin ve her vechile vesâyet uhdesinden gelmeğe kādir olduğu, sikāt-ı muvahhidînden olup zeyl-i vesîkada isimleri mastûr olan müslimîn ihbârlarıyla lede’ş-şer‘i’l-mutahhar mütehakkik ve müte‘ayyin olduğu ecilden, sagīre-i mezbûrenin tesviye-i umûruna mezkûr Ahmed Çelebi kıbel-i şer‘den vasî nasb ve ta‘yîn olunup ol dahi vesâyet-i mezbûreyi kabûl ve merâsimini edâya müte‘ahhid olmağın mâ vaka‘a bi’t-taleb ketb olundu. Hurrire fî gurreti Cemâziyelâhir sene erba‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Nâzikîzâde Mustafa Efendi, Mustafa Efendi el-Kâtib, Mehmed Çelebi b. Mahmud, Ali Ağa b. Hüseyin, es-Seyyid Abdullah b. Mustafa, mu‘îd Ahmed Çelebi b. Süleyman, Mustafa el-Muhzır, Şâmî Mehmed Efendi, Ali Çelebi b. Muharrem? ve gayruhüm.