İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 878 Hüküm no: 1203 Orijinal metin no: [127b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın, Haçador v. Narun aleyhindeki davasında sulh olduğu Mahmiye-i İstanbul’da Derviş Ali mahallesi sâkinelerinden Belkıs bt. Abdullah nâm hâtun tarafından sulh-ı âti’l-beyânı ikrâra vekîl olup Mehmed Beşe b. Abdullah ve Osman b. Abdullah nâm kimesneler şehâdetleri ile şer‘an vekâleti sâbite olan Receb Çelebi b. Hüseyin meclis-i şer‘-i hatîrde işbu bâ‘isü’s-sifr Haçador v. Baron nâm Ermeni muvâcehesinde bi’l-vekâle ikrâr ve takrîr-i kelâm edip merkūm Haçador bundan akdem odun atarken müvekkilem mezbûrenin yüzünün sağ yanına hatâ’en odun dokunup şiddet-i darbdan üst ön dişi çıkıp mûcibini mezbûr Haçador’dan taleb ve da‘vâ eylediğinde beynlerinde münâza‘ât-ı kesîre vâkı‘a olmuşidi el-hâletü hâzihî vesâtat-ı muslihîn ile da‘vâ-yı mezbûreden mesfûr Haçador müvekkilem mezbûreyi nakd-i râyic fi’l-vakt beş yüz akçe üzerine inşâ-i akd-i sulh eyledikde müvekkilem mezbûre Belkıs dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi merkūm Haçador yedinden tamânen ahz u kabz edip da‘vâ-yı mezbûreden merkūm Haçador’u ibrâ-i âm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâbi‘ aşer min Cemâziyelevvel sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Şükrullah b. Mustafa, Veli b. Mahmud, Resûl b. Rıdvan ve gayruhüm.