İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 898 Hüküm no: 1224 Orijinal metin no: [132b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedî Mehmed Çavuş b. Abdullah’ın Salamon v. İlyazer aleyhine açtığı davada haklı olduğu İşbu kitâb-ı sıhhat-nisâbın sâhibi Mehmed Çavuş b. Abdullah nâm mühtedî mahfil-i kazâda, Edirne cemâ‘atinden olup bundan akdem hâlik olan Yasef v. Mosi nâm yahudinin verâseti, zevce-i metrûkesi Hırisokali bt. İlyazer nâm yahudiye ile kız karındaşı oğlu Avraham v. Mosi nâm yahudiye münhasıra olup kable’l-kısme mezbûre Hırisokali dahi hâlike olup verâseti, li ebeveyn er karındaşı Salamon nâm yahudiye münhasıra olduğu şer‘an zâhir ve mütehakkik oldukdan sonra hâlikân-ı mezkûrânın cümle terekelerine vâzı‘u’l-yed olan merkūm Salamon muvâcehesinde üzerine takrîr-i da‘vâ edip mezbûr Yasef hâl-i hayâtında ve kemâl-i akl u sıhhatinde hâlik olduğumda cemî‘ malın sülüsü kız karındaşım oğlu Mehmed Çavuş’a verile deyû bana vasiyyet edip musırran alâ îsâ’ihî mürd oldukda hâkim-i muvakki‘-i kitâb tûbâ-lehû ve hüsnü me’âb hazretleri huzûrunda mezkûr Yasef’in vasiyyetini şuhûd-ı udûlle isbât ve edâsına hükm-i şer‘î lâhık olmuşken mezkûre Hırisokali hayâtında hâlik-i evvel-i mezbûr Yasef zimmetinde cihet-i karzdan otuz bin akçe hakkım vardır deyû terekesinden bilâ-isbât ve tahlîf otuz bin akçe ve terekesinden kable ihrâci’s-sülüs rub‘ hissesi için on sekiz bin akçe ki cem‘an kırk sekiz bin akçe kabz edip mürd oldukda, cemî‘ tereke-i vâfiyyesine ve müteveffâ-yı evvel-i mezkûr Yasef’in dahi yedimde olan defter-i müfredât nâtık olduğu üzre bi hükmi’l-münâsahati’ş-şer‘iyye tereke-i menkūle-i ma‘lûme mezbûr Salamon vaz‘-ı yed etmekle meblağ-ı merkūm kırk sekiz bin akçenin sülüsü olan on altı bin akçeyi ve defter nâtık olduğu tereke-i menkūlenin ba‘de’t-takvîm sülüsünü mezbûr Salamon bana teslîm etmemişdir, ba‘de’s-suâl teslîmine tenbîh olunmak matlûbumdur dedikde gıbbe’s-suâl mesfûr Salamon cevâbında mûrisesi mezbûre Hırisokali hayâtında vech-i meşrûh üzre tereke-i hâlik-i evvel terekesinden bilâ-isbât ve tahlîf meblağ-ı mezbûr otuz bin akçeyi ve kable ihrâci’s-sülüs rub‘ hissesi için on sekiz bin akçe ki cem‘an kırk sekiz bin akçe kabz eyledikden sonra mürd olup cemî‘ tereke-i vâfiyyesine vaz‘-ı yed eylediğini ikrâr edip lâkin hâlik-i evvel-i mezbûr Yasef’in bi hükmi’l-münâsahati’ş-şer‘iyye defter-i mezkûr nâtık olduğu tereke-i menkūle-i mesfûreye vaz‘-ı yedini inkâr edicek müdde‘î-i merkūmdan sıdk-ı makālini mübeyyine [beyyine] taleb olundukda ityân-ı beyyine için istimhâl etmeğin mehl-i şer‘î ile imhâl olundukdan sonra ikrârı olan meblağ-ı mezbûr kırk sekiz bin akçenin sülüsü on altı bin akçeyi tereke-i hâlike-i sâniyye Hırisokali’den edâya tenbîh birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelâhir li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hasan, Şükür Bey b. Mustafa, Veli b. Mahmud, Resûl b. Rıdvan ve gayruhüm.