İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 902 Hüküm no: 1228 Orijinal metin no: [133b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdülbâkī’nin ölen kızı Ayşe’nin mirasıyla ilgili olarak kocası Hacı Hüseyin aleyhine açtığı miras davasında iddiasını ispat edemediği Mahmiye-i İstanbul’da Kalenderhâne mahallesi sâkinelerinden olup bundan akdem fevt olan Ayşe bt. Hacı Hüseyin nâm müteveffânın vâlidesi Fâtıma bt. Abdülbâkī meclis-i şer‘-i hatîrde müteveffât-ı mezbûrenin babası mezbûr el-Hâc Hüseyin mahzarında üzerine da‘vâ ve takrîr-i kelâm edip mezbûr el-Hâc Hüseyin kızım mezbûre Ayşe’ye hâl-i sıhhatinde bir mücevher kuşak ve bir çift altın bilezik ve bir küpe ve bir incili yaka ve iki serâser döşek ve beş aded serâser yorgan ve on aded çatma yastık ve sekiz aded kumaş kaftan ve altın düğmeli bir kumaş kaftanını hibe-i sahîha ile hibe ve temlîk edip ol dahi ittihâb ve temellük edip hâlâ kızım mezbûre Ayşe vefât etmekle mezbûr el-Hâc Hüseyin eşyâ-i mezbûru ahz u kabz etmişdir, suâl olunup kızım mezbûrenin terekesinden olmağla sülüs hisse-i şer‘iyyesi alıverilmek matlûbumdur dedikde gıbbe’s-suâl mezbûr el-Hâc Hüseyin hibe-i mezbûreyi inkâr edicek müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyine için dört beş def‘a istimhâl ve her kerede mehl-i şer‘î ile imhâl olunup bir vechile ityân-ı beyyineye kudreti olmamağın bî-vech ta‘arruzdan men‘ birle mâ vaka‘a bi’t-taleb ketb olundu. Fi’l-yevmi’l-âşir min Cemâziyelâhir li sene erba‘a ve seb‘în ve elf. Şuhûdü’l-hâl: Mehmed Efendi b. Receb, Abdullah b. Himmet, İlyas b. Arzuman, Ali Çelebi b. Hasan, Şaban b. Mustafa, Hacı Hasan b. Şaban ve gayruhüm.