İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 901 Hüküm no: 1227 Orijinal metin no: [133a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Mustafa’nın, Canbâz Receb b. Mehmed aleyhine açtığı davada haklı olduğu İşbu râfi‘ü’l-kitâb el-Hâc Mehmed b. Mustafa meclis-i şer‘-i hatîrde canbâz tâifesinden Receb b. Mehmed mahzarında üzerine takrîr-i da‘vâ edip mukaddemâ al tüylü bir bârgiri otuz sekiz kıt‘a esedî guruş semen-i makbûza mezbûr Receb’den iştirâ ve kabz edip mülk-i müşterâm olup yedimde iken, Hacıoğlu Pazarcığı kazâsına tâbi‘ Altepe nâm karye sükkânından İvaz b. Alimî Bey nâm kimesne zikr olunan bârgire müstahık çıkıp mülkümde iken sirkat olunmuşdu deyû Budin sahrâsında bin yetmiş üç senesi Zilhiccesi’nin on dokuzuncu gününde ordu-yı hümâyûn kadısı olan Ünsî Efendi huzûrunda Muslu Bey b. Hüseyin ve Veli Beşe b. Hüseyin şehâdetlerinde muvâcehemde ba‘de’l-isbât ve’t-tahlîf ve’l-hükm zikr olunan bârgiri yedimden nez‘ ve ahz etmişdi hâlâ ben dahi mezkûr Receb’e mürâca‘at edip semen deyû benden makbûzu olan otuz sekiz esedî guruşu geri bana red ve teslîme mezbûr Receb’e tenbîh olunmak matlûbumdur dedikde gıbbe’s-suâl mezkûr Receb cevâbında müdde‘î-i mezbûrun yedinden bi hükmi’l-istihkāk nez‘ ve ahz olunan bârgir benden semen-i makbûz-ı mezkûra iştirâ ve kabz eylediği bârgir idiği ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i İstanbul’da Kazgânî Sadi mahallesinde sâkin Osman Çelebi b. Ebûbekir ve Sofular mahallesinde sâkin Hüseyin Bey b. Mehmed nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ bi hükmi’l-istihkāk müdde‘î-i mezbûrun yedinden nez‘ ve ahz olunan mârrü’l-vasf bârgir müdde‘î-i mezbûr el-Hâc Mehmed bi aynihî mezbûr Receb’den semen-i makbûz-ı mezbûra iştirâ ve kabz eylediği bârgir olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Hurrire fi’l-yevmi’s-sâdis min Cemâziyelâhir li sene erba‘a ve seb‘în ve elf. Şuhûdü’l-hâl: Arslan Çelebi b. el-Hâc Yusuf, Abdurrahman Beşe Çukadar, el-Hâc Ahmed b. Mahmud, Abdullah b. Hüseyin ve gayruhüm.