İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 903 Hüküm no: 1230 Orijinal metin no: [133b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Azire bt. Allahverdi’nin ölen babasının mirasındaki hissesini zabt ettiği iddiasıyla annesi Vartane bt. Turac aleyhine açtığı davada haksız olduğu Mahmiye-i İstanbul’da Cerrâhbaşı İshak Bey mahallesi sükkânından olup on seneden berî meflûc ve muk‘ad iken bundan akdem hâlik olan Allahverdi v. Toma nâm zimmînin verâseti, zevce-i metrûkesi Vartane bt. Turac nâm Ermeniye’ye ve sulbî kebîr oğlu David’e ve sulbiye kebîre kızları Azire ve Avavgide nâm Ermenilere münhasıra olduğu şer‘an mütehakkik oldukdan sonra mezkûre Azire mahfil-i kazâda, zikri âtî menzile vâzı‘atü’l-yed olan mezkûre Vartane muvâcehesinde üzerine takrîr-i da‘vâ edip mahalle-i mezbûrede vâki‘ bir tarafı Rıdvan Halîfe veresesi mülklerine ve bir tarafı Semerci Yani mülküne ve bir tarafı İshak v. Ravce mülküne ve bir tarafı tarîk-i âma müntehî tûlen ve arzen bi hesâb-ı terbî‘î üç yüz zirâ‘ mülk arsa üzerine mebnî fevkānî iki tahtânî üç odaları ve kenîfi ve havluyu müştemil mülk menzil babam mezbûrun ile’l-helâk mülkü olup ba‘de helâkihî bi hasebi’l-irsi’ş-şer‘î otuz iki sehim i‘tibâr olunup dört sehimi mezbûre Vartane ve on dört sehimi mezbûr David’e ve yedi sehimi mezkûre Avavgide’ye ve yedi sehimi bana isâbet etmişken mezkûre Vartane mecmû‘-ı menzil-i mezkûra bi gayri hakkın vaz‘-ı yed edip irsen isâbet eden yedi sehim hisse-i şer‘iyyemi bana teslîm etmez, suâl olunup kasr-ı yed ve bana teslîme mezkûr Vartane’ye tenbîh olunmak matlûbumdur dedikde gıbbe’s-suâl mezkûre Vartane cevâbında zikr olunan menzilin mecmû‘-ı ebniyesi benim mülk ve hakkım olup arsası hâlik-i mezbûr Allahverdi’nin hayâtında mülkü iken târih-i kitâb senesi Cemâziyelevvelisi’nin evâsıtında bana üç yüz guruş semen-i makbûza bâtten bey‘ ve teslîm ben dahi iştirâ ve kabûl ve kabz edip hattâ ebniye-i meşrûha benim mülk ve hakkım olduğunu alâ re’si’l-işhâd ikrâr ve işhâd, ben dahi tasdîk edip ol vechile menzil-i mahdûd-ı mezkûrun mecmû‘u mülk-ı mahzım olduğuna binâ’en vaz‘-ı yed ederim deyû def‘le mukābele edicek gıbbe’l-istintâk ve’l-inkâr mezkûre Vartane’den def‘-i mezbûrunu mübeyyine beyyine taleb olundukda udûl-i müslimînden olup mahalle-i mezbûre imâmı Mehmed Efendi b. Mustafa ve müezzini Abdurrahman Halîfe b. Mehmed ve el-Hâc Veli b. Mustafa ve Dilaver b. Abdullah nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ on seneden berî meflûc ve muk‘ad olan mezkûr Allahverdi hayâtında menzil-i mahdûd-ı mezkûrun cemî‘ ebniyesi zevcem Vartane’nin mülk-ı mahz-ı sahîhidir, vechen mine’l-vücûh ve sebebin mine’l-esbâb benim hak ve alâkam yoktur deyû huzûrumuzda ikrâr ve bizi işhâd edip mezkûre Vartane tasdîk eyledikden sonra mezkûr Allahverdi silk-i mülkünde münselik olan menzil-i mahdûd-ı mezkûrun bi hesâb-ı mezbûr üç yüz zirâ‘ arsasını huzûrumuzda zevcesi mezkûre Vartane[’ye] üç yüz guruş semen-i makbûza bâtten bey‘ ve teslîm ol dahi iştirâ ve kabûl ve kabz eyledi, ol vechile mecmû‘-ı mahdûd-ı mezkûr mesfûre Vartane’nin mülk-i mahz-ı sahîhi olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelâhir li sene 1074. Şuhûdü’l-hâl: Mehmed Çavuş b. Abdullah, Abdurrahman Beşe b. Bâli, Nasûh Beşe b. Yusuf, Hızır b. Mehmed ve gayruhüm.