İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 904 Hüküm no: 1231 Orijinal metin no: [134a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali tarafından vakfedilen menzilin tevliyyet ve gelirini zabt etme hakkının Sâlih Çelebi b. Şeyhî’de olduğu Mahmiye-i İstanbul’da Müftü Ali Çelebi mahallesinden olup zikri âtî da‘vâya kıbel-i şer‘den me’zûn olan işbu râfi‘ü’l-kitâb Sâlih Çelebi b. Şeyhî nâm kimesne dîvân-ı kāimmakām-ı sadr-ı a‘zamîde ma‘kūd olan mahfil-i kazâda, zikri âtî tevliyyet ve galleyle vâzı‘atü’l-yed olan Gevher bt. Ali nâm hâtun mahzarında üzerine takrîr-i da‘vâ edip merhûm ceddim el-Hâc Sâdık nâm sâhibü’l-hayr vakıf ve tevliyyet ve gallesini batnen ba‘de batnin evlâdına ve evlâd-ı evlâdına ve evlâd-ı evlâd-ı evlâdına şart u ta‘yîn eylediği mahmiye-i mezbûrede Mercan çarşısında vâki‘ iki tarafı Arabacıbaşı vakfına ve iki tarafı tarîk-i âma müntehî tahtında üç bâb dükkânı hâvî vakıf menzilin tevliyyet ve gallesi ben vâkıf-ı mezkûrun sulbî oğlu Mahmud’un sulbiye kızı Ayşe Hâtun’un sadrî oğlu olduğu ecilden ber mûceb-i şart-ı vâkıf bana intikāl etmeğin mezkûre Gevher vâkıf-ı mezbûrun sulbî oğlu Ali’nin sulbî oğlu Ahmed’in sulbiye kızı Fâtıma’nın sadriyye kızı olup bir batın benden mu’ahhar ve vücûdumla mahrûme iken hilâf-ı şart-ı vâkıf menzil-i mevkūf-ı mezkûrun tevliyyet ve gallesine mezkûre Gevher bi gayri hakkın vaz‘-ı yed eder, suâl olunup kasr-ı yed edip bana teslîme mezkûre Gevher’e tenbîh olunmak matlûbumdur dedikde gıbbe’s-suâl mezkûre Gevher cevâbında fi’l-vâki‘ vâkıf-ı mezbûr menzil-i mevkūf-ı mezbûrun tevliyyet ve gallesini batnen ba‘de batnin evlâdına ve evlâd-ı evlâdına ve evlâd-ı evlâd-ı evlâdına şart u ta‘yîn eylediğine ve müdde‘î-i mezkûr Sâlih Çelebi vâkıf-ı mezkûrun sulbî oğlu Mahmud’un sulbiye kızı Ayşe’nin sadrî oğlu olup kendi vâkıf-ı mezbûrun sulbî oğlu Ali’nin sulbî oğlu Ahmed’in sulbiye kızı Fâtıma’nın sadriyye kızı olmağla bir batın müdde‘î-i mezbûrdan mu’ahhar olduğu ecilden mahrûme olup tevliyyet ve galle müdde‘î-i mezbûr Sâlih Çelebi’ye intikāl eylediğini bi tav‘ihâ ikrâr ve i‘tirâf etmeğin alâ mûcebi i‘tirâfihâ kasr-ı yed edip müdde‘î-i mezkûra teslîme mezkûre Gevher’e tenbîh birle mâ hüve’l-vâki‘ bi’t-taleb ketb olundu. Fî gurreti Cemâziyelâhir li sene erba‘a ve seb‘în ve elf. Şuhûdü’l-hâl: Umdetü’l-a‘yân Ali Ağa b. Hasan, Abdülkerim Ağa b. Bâli, Receb Çavuş b. ( ), Nasûh Beşe b. Yusuf, Mehmed Efendi b. Mahmud, İsmail b. Murad ve gayruhüm.