İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 911 Hüküm no: 1243 Orijinal metin no: [135b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bekir Beşe b. Mehmed’in Yazıcı Esteryo v. Laskar’da ticaret ortaklığından alacağı olduğu Dârü’l-hilâfeti’l-aliyye Kostantıniyye el-mahmiyye hısnı ebvâbından Yenikapı hâricinde vâki‘ selhhânede üstâd olan Bekir Beşe b. Mehmed meclis-i şer‘-i hatîr-i lâzımü’t-tevkīrde Yazıcı Esteryo v. Laskar nâm zimmî muvâcehesinde üzerine da‘vâ ve takrîr-i kelâm edip merkūm Yazıcı Esteryo ile bundan akdem şerîkler olup hâlâ fesh-i şirket eylediğimizde ba‘de’l-hesâb, zimmetinde mal-ı şirketden kırk üç bin yüz akçe hakkım bâkī kalmışdır, suâl olunup alıverilmek matlûbumdur dedikde gıbbe’s-suâl merkūm Yazıcı Esteryo cevâbında kaziyye bâlâda tahrîr olunduğu vech üzre olup müdde‘î-i merkūm Bekir Beşe’ye cihet-i mezbûreden kırk üç bin yüz akçe vâcibü’l-edâ deyni olduğunu bi tav‘ihî ikrâr etmeğin ikrârı mûcebince meblağ-ı mezbûr kırk üç bin yüz akçeyi müdde‘î-i mezbûr Bekir Beşe’ye edâ ve teslîme merkūm Yazıcı Esteryo’ya tenbîh birle mâ vaka‘a bi’t-taleb ketb olundu. Hurrire fi’l-yevmi’l-hâdî aşer min Cemâziyelâhir li sene erba‘a ve seb‘în ve elf. Şuhûdü’l-hâl: İbrahim Ağa b. Ömer, el-Hâc Ahmed b. Mahmud, Abdi Çelebi b. Hüseyin, Şükrullah b. Mustafa, ve gayruhüm.