İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 911 Hüküm no: 1242 Orijinal metin no: [135b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’ın, menzil bağ ve tarlasını Franko v. Yorgi’ye sattığı Havâss-ı Refî‘a a‘mâlinden Büyükçekmece nâhiyesinde Bozdarı nâm karye sâkinlerinden Hasan Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’s-sifr Franko v. Yorgi muvâcehesinde ikrâr ve takrîr-i kelâm edip zikri âtî bey‘in sudûruna dek mülk ve hakkım olan karye-i mezbûrede vâki‘ tarafeyni müşterî-i mezbûrun mülkü ve bir tarafı Kapıcı Mustafa Bey menzili ve bir tarafı tarîk-i âm ile mahdûd bir oda ve bir sundurma ve havluyu müştemil mülk menzilimi yedi bin akçeye ve yine karye-i mezbûrede vâki‘ bir tarafı Çorbacı karısı tarlası ve bir tarafı Mustafa Beşe tarlası ve bir tarafı Kapıcı Mustafa Bey bağı ve bir tarafı Kosta nâm zimmî bağı ile mahdûd bir kıt‘a mülk bağımı, bin akçeye bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra yine karye-i mezbûre sınırı dâhilinde vâki‘ tarafeyni Çorbacı Karısı tarlası ve tarafeyni Dereye müntehî taht-ı tasarrufumda olan bir kıt‘a tarlanın hakk-ı tasarrufunu ma‘rifet-i sâhib-i arz ile merkūm Franko’ya beş yüz akçe bedel mukābelesinde tefvîz edip ol dahi tefevvüz ve kabûl eyledikden sonra menzil-i mahdûd-ı mezkûr ile bağ-ı mahdûd-ı mesfûrun mecmû‘ semenleri olan sekiz bin akçe ile bedel-i tefvîz olan beş yüz akçe cem‘an sekiz bin beş yüz akçeyi merkūm Franko yedinden bi’t-tamâm ahz u kabz edip mahallerinde zabt ve tasarrufa mezbûr Franko’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Odabaşı Mehmed Beşe, Mustafa Beşe b. Abdullah, İbrahim Ağa b. Abdullah, Abdullah Çelebi b. ( ), Veli Efendi el-imâm ve gayruhüm.