İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 913 Hüküm no: 1247 Orijinal metin no: [136a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Odabaşı b. Hasan’ın, Hasan Bey b. Ali’den satın aldığı cariye Şahbaz’ın hür olduğunun anlaşıldığı Mahmiye-i İstanbul’da Âtike Sultan mahallesi sâkinlerinden işbu râfi‘ü’l-kitâb Mehmed Odabaşı b. Hasan meclis-i şer‘-i hatîr-i lâzımü’t-tevkīrde Hasan Bey b. Ali mahzarında üzerine takrîr ve da‘vâ edip mukaddemâ açık kaşlı ala gözlü orta boylu Şahbaz ismiyle müsemmât bir câriyeyi mezbûr Hasan Bey’den yüz on sekiz esedî guruş semen-i makbûza iştirâ ve kabz edip câriye-i mevsûfe-i mezbûre mülk-i müşterâm oldukdan sonra ben dahi Osman Beşe nâm kimesneye yüz elli guruş semen-i ma‘lûm-ı makbûza bey‘ ve teslîm eylediğimden sonra merkūm Osman Beşe dahi İbrahim nâm kimesneye semen-i ma‘lûm-ı makbûza bey‘ ve teslîm ol dahi iştirâ ve tesellüm eyledikden sonra ol dahi Ahmed nâm kimesneye semen-i ma‘lûm-ı makbûza bey‘ ve teslîm ol dahi iştirâ ve tesellüm eyledikden sonra ol dahi Süleyman nâm bevvâb-ı sultânîye semen-i ma‘lûm-ı makbûza bey‘ ve teslîm edip ol dahi iştirâ ve tesellüm eylediğinden sonra mevsûfe-i mezbûre Şahbaz mezkûr Süleyman’ın yedinde iken hürretü’l-asl olduğunu bin yetmiş üç senesi şehr-i Rebî‘ulevveli’nin on üçüncü gününde mahmiye-i İstanbul’da Mahmudpaşa mahkemesinde nâibü’ş-şer‘ olan Ali Efendi huzûrunda Ramazan Ağa b. Ali ve Hüseyin Bey b. Muharrem nâm kimesneler şehâdetleri ile ba‘de’l-isbât ve’l-hükm sebîli tahliyye olundukdan sonra zikr olunan bâ[yi]‘adan her biri âhara vech-i şer‘î üzre mürâca‘at edip ba‘de’l-isbât ve’l-hükm semen deyû verdikleri meblağları kabz etmişler idi hâlâ ben dahi mezbûr Hasan Bey’e mürâca‘at edip semen deyû benden makbûzu olan yüz on sekiz esedî guruşu taleb ederim bana geri red ve teslîme merkūm Hasan Bey’e tenbîh olunmak matlûbumdur dedikde gıbbe’s-suâl mezbûr Hasan Bey cevâbında vech-i muharrer üzre hürriyeti isbât olunup sebîli tahliyye olunan câriye müdde‘î-i mezbûrun benden semen-i makbûza iştirâ ve kabz eylediği Şahbaz câriye idiği ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i mezbûrede Yenibahçe kurbunda Karabaş mahallesinde sâkin Mustafa Bey b. Yusuf ve Debbâğ Yunus mahallesinde sâkin Mehmed b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ vech-i meşrûh üzre hürriyeti isbât olunup sebîli tahliyye olunan mârrü’l-arz câriye müdde‘î-i mezbûr Mehmed Odabaşı bi aynihî merkūm Hasan Bey’den semen-i makbûza iştirâ eylediği Şahbaz câriye olduğuna şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mâ vaka‘a bi’t-taleb ketb olundu. Fi’l-yevmi’s-sâlis aşer min Cemâziyelâhir li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Nasûh Beşe b. Yusuf, Abdi Çelebi b. Hüseyin, Şükrullah Bey b. Mustafa, Mustafa Çelebi b. Ali ve gayruhüm.