İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 914 Hüküm no: 1249 Orijinal metin no: [136a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin Bekir Beşe b. Mehmed’de alacağı olduğu Celeb tâifesinden Yorgi v. Yani nâm zimmî meclis-i şer‘-i hatîr-i lâzımü’t-tevkīrde Yenikapı hâricinde vâki‘ selhhânede üstâd olan Bekir Beşe b. Mehmed mahzarında üzerine da‘vâ ve takrîr-i kelâm edip mezbûr Bekir Beşe zimmetinde yedimden müşterâ ve makbûz beynimize adedi ma’lûme koyun bahâsından yirmi beş bin dört yüz [136b] dört yüz9 kırk dört akçe hakkım olup mezbûr Bekir Beşe’nin dahi işbu hâzır bi’l-meclis Mosko v. Yani zimmetinde mal-ı şirketden on beş bin akçe hakkım olmağla merkūm Bekir Beşe cihet-i mezbûreden mesfûr Mosko zimmetinde olan on beş bin akçe hakkın îcâb-ı muhayyel ve kabûl ve muhtâl ve rızâ-yı muhtâlün-aleyhi hâviye havâle-i sahîha-i şer‘iyye ile bana havâle eyledikden sonra zimmetinde on bin dört yüz kırk dört akçe hakkım dahi bâkī kalmışdır, suâl olunup alıverilmek matlûbumdur dedikde gıbbe’s-suâl merkūm Bekir Beşe cevâbında kaziyye bâlâda tafsîl-i mürûr ettiği vech üzre olduğunu bi tav‘ihî ikrâr etmeğin ikrârı mûcebince vech-i meşrûh üzre zimmetinde bâkī kalan on bin dört yüz kırk dört akçeyi müdde‘î-i mezbûr Yorgi’ye edâ ve teslîme merkūm Bekir Beşe’ye tenbîh birle mâ vaka‘a bi’t-taleb ketb olundu. Fi’l-yevmi’l-hâdî aşer min Cemâziyelâhir sene erba‘a ve seb‘în ve elf. Şuhûdü’l-hâl: İbrahim Ağa b. Ömer kethüdâ-yı kassâbân, el-Hâc Ahmed b. Mahmud, Abdi Çelebi b. Hüseyin, Şükrullah b. Mustafa, Veli b. Mahmud ve gayruhüm.