İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 915 Hüküm no: 1250 Orijinal metin no: [136b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kazar v. Vasil’in, Kamri v. Karagöz aleyhindeki alacak davasında sulh olduğu Mahmiye-i İstanbul’da Vâlide Hânı’nda sâkin tüccâr tâifesinden Kazar v. Vasil nâm zimmî meclis-i şer‘de işbu bâ‘isü’s-sifr Kumru v. Karagöz nâm zimmî muvâcehesinde ikrâr ve takrîr-i kelâm edip mezbûr Kumru zimmetinde evsâfı beynimizde ilm-i şer‘î ile ma‘lûme Acem metâ‘ı semeninden altmış esedî guruş hakkım vardır deyû bundan akdem mezbûrdan da‘vâ ve taleb eylediğimde ol dahi inkâr etmekle beynimizde münâza‘ât-ı kesîre vâkı‘a olmuşidi. El-hâletü hâzihî vesâtat-ı muslihîn ile mezbûr Kumru beni da‘vâ-yı mezbûrumdan yirmi esedî guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr yirmi esedî guruşu mezbûr Kumru yedinden tamâmen ahz u kabz edip mâ‘adâ kırk guruş da‘vâsından mezbûr Kumru’nun zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min [Cemâziyelâhir sene 1074]. Şuhûdü’l-hâl: El-Hâc Ahmed b. Mahmud, Abdurrahman Beşe b. Bâli, Şükrullah b. Mustafa, Abdi Çelebi b. Hüseyin ve gayruhüm.