İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 935 Hüküm no: 1270 Orijinal metin no: [141b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mustafa Ağa’nın evini Mustafa b. Sakabaşı Ahmed Ağa’ya sattığı Bey‘-i menzil Husûs-ı âti’l-beyânın mahallinde tahrîri için gıbbe’l-iltimâs kıbel-i şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi mahmiye-i İstanbul’da Harrât Kemal mahallesinde Mustafa Ağa b. Ahmed nâm kimesnenin menziline varıp zeyl-i kitâbda mastûrü’l-esâmî olan müslimîn mahzarlarında akd-i meclis-i şer‘-i münîr eyledikde merkūm Mustafa Ağa meclis-i ma‘kūd-ı mezkûrda yedinci Ağa bölüğü çorbacısı olan işbu sâhibü’l-kitâb fahrü’l-a‘yân ve’l-ekfâ Sakabaşı Ahmed Ağa b. Mustafa mahzarında ikrâr ve takrîr-i kelâm edip zikri âtî bey‘in sudûruna değin mülk ve hakkım olup mahalle-i mezbûrede vâki‘ bir tarafı ba‘zan müezzin Hasan Çelebi ve ba‘zan Solak İbrahim Çelebi menzilleri olup ve bir tarafı ba‘zan Kazancı Hacı Süleyman hâtunu Kâtibe Hâtun ve ba‘zan Sirkeci kızı Fâtıma Hâtun menzilleri ve tarafeyni tarîk-i âma müntehî hâriciyyesi fevkānî üç oda ve bir sofa ve tahtânî iki oda ve kenîf ve ahırı dâhiliyyesi tabaka-i ulyâsında dört oda ve tabaka-i vustâsında iki oda ve bir kenîf ve tabaka-i süflîsînde bir kiler odası ve bir muhtib ve bir hamam ve bir câmekân ve bir matbah ve bir kenîf ve iki bi’r-i mâ ve zât-ı eşcâr-ı müsmire ve gayr-ı müsmire iki kıt‘a bahçeyi müştemil mülk menzili bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mûmâ-ileyh Sakabaşı Ahmed Ağa’ya nakd-i râyic fi’l-vakt beş yük akçeye bey‘-i bâtt-ı sahîh-ı şer‘î ile bey‘ ve teslîm ol dahi iştirâ ve kabûl ve kabz ve teslîm eyledikden sonra semeni olan meblağ-ı mezbûr beş yük akçeyi yedlerinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûr müşterî-i mûmâ-ileyh Sakabaşı Ahmed Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şifâhî ve’t-tahkīki’l-vicâhî vâki‘ü’l-hâli Mevlânâ-yı mezbûr mahallinde tahrîr, ba‘dehû ma‘an ba‘s olunan Abdurrahman Beşe b. Bakī, Muharrem Çelebi b. Abdullah ile meclis-i şer‘-i hatîr-i lâzımü’t-tevkīre gelip ihbâr ve takrîr etmeğin mâ vaka‘a bi’l-ibtigā ketb ü imlâ olundu. Fi’l-yevmi’s-sâbi‘ aşer min Cemâziyelâhir sene erba‘a ve seb‘în ve elf. Şuhûdü’l-hâl: Fahrü’l-eimme Seyfullah Efendi b. Osman el-İmâm, Seyyid Musa b. Seyyid Mehmed el-Müezzin, Fahrü’l-a‘yân Mustafa Ağa b. Mehmed, Murad Beşe b. Hasan [Bölü]k 21, Mahmud Ağa b. Ali C[emâ‘at] 15, Ahmed Efendi kâtib-i fodla sâbıkan, Umdetü erbâbi’t-tahrîr ve’l-kalem Ali Efendi kâtib-i câmi‘, Mahmud Ağa b. Ahmed, Mustafa Çavuş b. Mehmed, Mustafa Beşe b. Mehmed, Halil Çelebi el-Kâtib, Mustafa Efendi b. Müstakīm ve gayruhüm.