İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 936 Hüküm no: 1272 Orijinal metin no: [142a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kırincan v. Yorgam’ın Mirza v. Karabet’e sattığı kuşaktan alacağının kalmadığı Tüccâr tâifesinden Kırincan? v. Yorgam nâm Ermeni mahfil-i kazâda mahmiye-i İstanbul’da Vâlide Hân’ında sâkin tüccârdan işbu hâmilü’s-sifr Mirza v. Karabet nâm Ermeni mahzarında tav‘an ikrâr ve i‘tirâf edip târih-i kitâbdan altı ay mukaddem altın üzerine yüz kırk elmas ve yüz kırk yakut taş ile murassa‘ on dört bâfte kuşağı mezkûr Mirza’ya beş bin kıt‘a riyâlî guruşa bey‘ ve teslîm ol dahi iştirâ ve kabûl ve kabz ve tesellüm eyledi deyû meblağ-ı mezbûr beş bin guruşu mezkûr Mirza’dan taleb ve da‘vâ eylemiş idim hâlâ meblağ-ı mezbûr beş bin guruşa ve târih-i kitâba gelince beynimizde cereyân eden şirket ve vedî‘at ve karz ve mudârebeye müte‘allika olan cemî‘ de‘âvî ve muhâsamât ve eymândan mezbûr Mirza’yı ibrâ eyledim ba‘de’l-yevm zikr olunan kuşağa ve semenine ve sâir husûslara müte‘allika merkūm Mirza kıbelinden benim için vechen mine’l-vücûh ve sebebin mine’l-esbâb hak ve alâka kalmadı zikr olunan husûslara müte‘allika benden da‘vâ sudûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî evâsıtı min Cemâziyelâhir li sene erba‘a ve seb‘în ve elf. Şuhûdü’l-hâl: Umdetü’l-a‘yân Mustafa Ağa b. Hıdır Çavuşbaşı, Arslan Çavuş el-Mübâşir, Halil Çavuş el-Mübâşir, Osman Bey b. Abdullah, Fahrü’l-emâcid Mahmud Ağa emîr-i gümrük ve gayruhüm.