İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 938 Hüküm no: 1275 Orijinal metin no: [142b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed Ağa’nın evini Fâtıma bt. Halil’e sattığı Mahmiye-i İstanbul’da Akseki mahallesinde sâkin Mustafa Ağa b. Mehmed nâm kimesne meclis-i şer‘-i hatîrde işbu râfi‘atü’l-kitâb Fâtıma bt. Halil nâm hâtun tarafından tasdîk-ı âti’l-beyâna vekîl olup Halil Bey b. İbrahim ve Süleyman Çelebi b. Mustafa nâm kimesneler şehâdetleri ile şer‘an vekâleti sâbite olan sadriyye kızı Rahime bt. Abdullah nâm hâtun mahzarında ikrâr ve takrîr-i kelâm edip mahalle-i mezbûrede vâki‘ bir tarafı Fâtıma Hâtun mülküne ve bir tarafı Belkıs Hâtun mülküne ve bir tarafı ba‘zan Zeyneb Hâtun vakfına ve ba‘zan Harameyn-i şerîfeyn vakfına ve bir tarafı tarîk-i âm ile mahdûd olup iki beyt-i ulvî ve bir sofa-i ulviye ve altında ahır ve bi’r-i mâ-i müşterek ve eşcâr-ı müsmire ve gayr-ı müsmireyi müştemil mülk menzilimi, cümle tevâbi‘ ve levâhıkı ve kâffe-i hukūk-ve merâfıkı ile müvekkile-i mersûme Fâtıma Hâtun’a otuz altı bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer iştirâ ve tesellüm ve kabz eyledikden sonra semeni olan meblağ-ı mezbûr otuz altı bin akçeyi müşteriye-i mezbûre Fâtıma Hâtun yedinden bi’t-tamâm alıp kabz eyledim. Menzil-i mahdûd-ı merkūm mezkûre Fâtıma Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’l-ışrîn min Cemâziyelâhir sene erba‘a ve seb‘ûn ve elf. Şuhûdü’l-hâl: Yusuf Efendi b. Abdullah, Mehmed Efendi el-Müezzin, Mehmed Çelebi b. Yusuf, Hasan Çelebi b. Mahmud Ömer Bey b. Abdullah ve gayruhüm.