İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 937 Hüküm no: 1274 Orijinal metin no: [142a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ali’nin el-Hâc Ahmed Bey b. Hızır’da emanet parası olmadığı Vilâyet-i Rumeli’nde Prizren nâm kasaba sükkânından Arnavud Mehmed Bey b. Ali nâm kimesne dîvân-ı sa‘âdet-makrûnda ma‘kūd mahfil-i kazâda, işbu râfi‘ü’l-kitâb el-Hâc Ahmed Bey b. Hızır mahzarında üzerine takrîr-i da‘vâ edip târih-i kitâbdan dört sene mukaddem cezîre-i Girid’e azîmet eylediğimde malımdan otuz hurda akçe ve kula bir aygır atımı mezbûr el-Hâc Ahmed’e îdâ‘ ve teslîm ol dahi îdâ‘ ve kabz eylemiş idi. Zikr olunan otuz akçe ile hibe-i mârrü’l-vasf atı merkūm el-Hâc Almed’den taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-vâki‘ târih-i mezbûrda müdde‘î-i mezbûrdan meblağ-ı merkūm otuz akçe ve mârrü’l-vasf atı îdâ‘ ve kabz etmeyip elân üzerine reddi lâzım olmadığına merkūm el-Hâc Ahmed’e yemîn teklîf olundukda ol dahi bi hasebi vefki’l-mes’ûl yemîn billâhi’l-aliyyi’l-a‘lâ etmeğin bilâ-beyân mu‘ârazadan men‘ birle mâ hüve’l-vâki‘ bi’t-taleb ketb olundu. Fî târihi’l-mezbûr. Şuhûdü’l-hâl: Hasan Bey b. Mehmed, Osman Odabaşı b. Mustafa, Ramazan Bey el-Yesâri ve gayruhüm.