İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 939 Hüküm no: 1277 Orijinal metin no: [142b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gazal v. Sefer’in ev ve bağlarını Agop v. Mardiros’a sattığı Medîne-i Ebâ Eyyûb-i Ensârî a‘mâlinden kasaba-i Hasköy mahallâtından Abdüsselam mahallesi sükkânından Gazal v. Sefer nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr Agop v. Mardiros nâm zimmî muvâcehesinde ikrâr ve takrîr-i kelâm edip zikri âtî bey‘in sudûruna değin mülk ve hakkım olup vilâyet-i Anadolu’da Arapgir sancağında Eğin kasabasında vâki‘ bir tarafdan Akırda ve bir tarafdan Avanos ve bir tarafdan Serkis ve bir tarafdan Kirkor nâm zimmîler menzilleri ile mahdûd bir bâb tahtânî oda ve bir sofayı müştemil menzilimi, otuz esedî guruşa ve yine kasaba-i mezbûrede vâki‘ iki tarafı Avanik ve bir tarafı Andon nâm zimmîler bağları ve bir tarafı Fırat suyu kenarında olan tarîk-i âm ile mahdûd bir kıt‘a mülk bağımı, elli esedî guruşa bey‘-i bâtt-ı sahîh-ı şer‘î ile bey‘ edip ol dahi iştirâ ve kabûl eyledikden sonra mecmû‘ semenleri olan seksen esedî guruşa müşterî-i merkūm Agop yedinden bi’t-tamâm alıp kabz edip mahallerinde zabt ve tasarrufa mezbûr Agop’a taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cemâziyelâhir sene 1074. Şuhûdü’l-hâl: El-Hâc Ahmed b. Mahmud, Abdi Çelebi b. Hasan, Şükrullah Bey b. Mustafa, Veli b. Mahmud ve gayruhüm.