İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 941 Hüküm no: 1281 Orijinal metin no: [143a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hıraman bt. Abdullah ile Hüseyin b. Abdullah’ın muhâlaa yoluyla boşandıkları Mahmiye-i İstanbul’da Ali Paşa mahallesi sâkinlerinden Hıraman bt. Abdullah tarafından hul‘-ı âti’l-beyânı ikrâra vekîl olup mezbûreyi ma‘rifet-i şer‘iyye ile ârifân olan Ali Çelebi b. Mehmed ve İsmail Çelebi b. Şaban şehâdetleri ile şer‘an vekâleti sâbite olan Mustafa Efendi b. Abdullah meclis-i şer‘de müvekkile-i mezbûrenin zevci Hüseyin b. Abdullah mahzarında bi’l-vekâle ikrâr ve takrîr-i kelâm edip müvekkilem mezbûre Hıraman’ın zevci mezbûr Hüseyin zimmetinde mütekarrir ve ma‘kūdun-aleyh olan bin akçe mehr-i müeccelinden yedi yüz akçesini ahz u kabz edip bâkī üç yüz akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre zevci mezbûr Hüseyin ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete ve gayra müte‘allika da‘vâdan her biri âharın zimmetini ibrâ-ı âm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelâhir sene erba‘a ve seb‘în ve elf. Şuhûdü’l-hâl: Ömer Çelebi el-Kayyım, Berber Hüseyin Çelebi, Muslu b. Mehmed, Abdi Çelebi b. [Hüseyin] ve gayruhüm.