İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 941 Hüküm no: 1280 Orijinal metin no: [143a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Mustafa arsasının Hüseyin Çelebi’nin yetimlerine bey‘ bi’l-istiğlâl yoluyla satıldığı Medîne-i Ebâ Eyyûb-i Ensârî’de Topçular mahallesi sâkinlerinden umdetü erbâbi’t-tahrîr ve’l-kalem zübdetü ashâbi’r-rakam ve’l-irfân Mehmed Efendi b. Mustafa tarafından husûs-ı âti’l-beyâna vekîli olup es-Seyyid Ahmed Ağa b. İbrahim ve Mehmed Beşe b. Mustafa nâm kimesneler şehâdetleri ile şer‘an vekâleti sâbite olan Mustafa Çelebi b. Hüdâverdi meclis-i şer‘-i hatîrde Hüseyin Çelebi ve Neslihan bt. el-merhûm Ahmed Ağa nâm sagīrlerin kıbel-i şer‘den mansûb vasîleri olan işbu râfi‘ü’l-kitâb umdetü’l-a‘yân Mehmed Ağa b. Hüseyin Ağa mahzarında bi’l-vekâle ikrâr ve takrîr-i kelâm edip mahmiye-i İstanbul’da Hoca Gıyaseddin mahallesinde vâki‘ bir tarafdan es-Seyyid Abdurrahman vakfı ve bir tarafdan el-Hâc Mehmed b. Hasan vakfı ve bir tarafdan ba‘zan Hoca Gıyaseddin mescid-i şerîfi ve ba‘zan yine Hoca Gıyaseddin vakfı ve bir tarafı tarîk-i âm ile mahdûd olup dört cidâra ve bir mahzene müştemil olan müvekkilim el-merhûm Mehmed Efendi’nin mülk arsasını, vasiyy-i merkūm Mehmed Ağa’ya bi tarîki’l-istiğlâl sagīrân-ı merkūmân Hüseyin Çelebi ve Neslihan’ın malları ile iki yüz esedî guruşa bey‘ edip ol dahi vech-i muharrer üzre iştirâ eyleyip kabz-ı semen ve teslîm-i mebî‘ eylediğimden sonra arsa-i merkūmeyi bi’l-vekâle vasiyy-i merkūm Mehmed Ağa’dan târih-i kitâbdan bir sene tamâmına dek kırk esedî guruşa istîcâr eyledim, ol dahi minvâl-i meşrûh üzre îcâr ve teslîm [eyledim] dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cemâziyelâhir sene erba‘a ve seb‘în ve elf. Şuhûdü’l-hâl: Süleyman Ağa b. Mustafa, Hasib b. Mahmud, Abdullah Efendi [b.] İbrahim, Ahmed Efendi el-Müezzin ve gayruhüm.