İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 942 Hüküm no: 1283 Orijinal metin no: [143b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Halil’in değirmenini Hüseyin Bey b. Mustafa’ya sattığı Mahmiye-i İstanbul’da Unkapanı kurbunda vâki‘ Üskübî mahallesi sâkinlerinden Mustafa Efendi b. Halil tarafından zikri âtî bey‘i ikrâra vekîl olup vekâleti Mustafa b. Ahmed ve Mehmed b. Ahmed nâm kimesneler şehâdetleri ile sâbite olan Mehmed Beşe b. Sinan nâm kimesne meclis-i şer‘-i hatîr-i lâzımü’t-tevkīrde işbu sâhibü’l-kitâb Hüseyin Bey b. Mustafa nâm kimesne mahzarında ikrâr ve takrîr-i kelâm edip müvekkil-i mezbûr Mustafa Efendi’nin bey‘-i câi’z-zikrin sudûruna dek mülk ve hakkı olup vilâyet-i Anadolu’da Güvercinlik kazâsında Çavuşköy demekle ma‘rûf karye sınırı dâhilinde vâki‘ Çan kazâsından cârî nehir üzerinde dâir etrâf-ı selâsesi nehr-i mezbûr ve bir tarafı tarîk-i âm ile mahdûd arsası senede altmış akçe mukāta‘a-i kadîmesi olan iki göz mülk değirmeni, merkūm Hüseyin Bey’e nakd-i râyic fi’l-vakt yetmiş iki akçeye bey‘-i bâtt-ı sahîh-ı şer‘î ile bey‘ edip ol dahi iştirâ ve kabûl eyledikden sonra semeni olan yetmiş iki akçeyi müşterî-i merkūme Hüseyin Bey talebiyle üç yüz on gün tamâmına değin te’cîl edip mârrü’z-zikr değirmeni mahallinde zabt ve tasarrufa müşterî-i mezbûr Hüseyin Bey’i taslît eyledim dedi dedikde gıbbe’t-tasdîki’ş-şifâhî ve’t-tahkīki’l-vicâhî mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelâhir sene erba‘a ve seb‘în ve elf. Şuhûdü’l-hâl: Mustafa Çelebi b. Ahmed, İsmail b. Mehmed, Hasan Beşe b. Ali, Mehmed b. Ahmed, Mustafa b. Hacı Ali ve gayruhüm.