İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 943 Hüküm no: 1284 Orijinal metin no: [143b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Serkis’in uncu Filyoz v. Yayla’ya borcu olduğu Mahmiye-i İstanbul’da uncu tâifesinden Filyoz v. Yayla nâm zimmî mahfil-i kazâda Kirkor v. Serkis nâm zimmî muvâcehesinde üzerine takrîr-i da‘vâ edip mezkûr Kirkor zimmetinde yedine müşterâ ve makbûz keyl ve kıymeti beynimizde ma‘lûm un bahâsından dört bin akçe hakkım vardır, hattâ mahzar-ı müslimînde meblağ-ı merkūm dört bin akçeyi zimmetinde olduğunu ikrâr dahi eylemişdir hâlâ taleb ederim suâl olunsun dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i merkūmede Harâccı Muhyiddin mahallesinde sâkin Ali Çelebi b. Abdullah ve Arpa Emîni mahallesinde sâkin Mehmed b. Ramazan nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ merkūm Kirkor bizim huzûrumuzda cihet-i mezbûreden müdde‘î-i merkūm Filyoz’a üzerine edâsı lâzım dört bin akçe deyni vardır deyû bi tav‘ihî ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olup mûcebince meblağ-ı merkūm dört bin akçeyi müdde‘î-i mezbûr Filyoz’a edâ ve teslîme mezbûr Kirkor’a tenbîh birle mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Mehmed b. Ramazan ve gayruhüm.