İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 946 Hüküm no: 1289 Orijinal metin no: [144a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gazal b. Mehmed’in terekesinin Mustafa Bey b. Mehmed’in olduğu Mahmiye-i İstanbul’da Sultân Selim câmi‘-i şerîfi kurbunda sâkin Habeşiyyü’l-asl Ali b. Mehmed nâm kimesne mahfil-i kazâda, sâbıkan Edirne kadısı olan a‘lemü’l-ulemâ’i’l-izâm merhûm Şeyh Mehmed Efendi’nin mahdûm-ı mükerremleri fahrü’l-müderrisîn Sâlih Mehmed Efendi tarafından husûs-ı âtîye vekîl olup nehc-i şer‘î-i mu‘teber üzre şer‘an vekâleti sâbite olan Mustafa Bey b. Mehmed nâm kimesne mahzarında üzerine takrîr-i da‘vâ edip bundan akdem vefât eden li ebeveyn kız karındaşım Gazal nâm Habeşiyyenin terekesine mûmâ-ileyh Sâlih Mehmed Efendi bi gayri vechin vaz‘-ı yed eder, müteveffât-ı mezbûrenin verâseti bana münhasıra olmağın hâlâ mezkûrenin terekesini müvekkil-i müşârün-ileyhden taleb eyledikde vermekde te‘allül eder, suâl olunup alıverilmesi matlûbumdur dedikde gıbbe’s-suâl vekîl-i mezbûr Mustafa Bey cevâbında müteveffât-ı mezkûre Gazal müvekkil-i mûmâ-ileyhin vâlidi merhûm-ı mûmâ-ileyh Şeyh Mehmed Efendi’nin mu‘tekası olduğuna binâ’en terekesine vaz‘-ı yed olduğunu inkâr edicek müdde‘î-i mezbûr Ali’den müdde‘âsını mübeyyine beyyine taleb olundukda ityân-ı beyyineden izhâr-ı acz edip bir vechile beyâna kādir olmamağla, bilâ-nakl ve isbât müvekkil-i mûmâ-ileyh Sâlih Mehmed Efendi mu‘ârazasından men‘ birle mâ vaka‘a bi’t-taleb ketb olundu. Hurrire fî târihi’l-mezbûr. Şuhûdü’l-hâl: Mustafa Efendi b. Muharrem, el-Hâc Ahmed b. Mahmud, Abdi Çelebi b. Hüseyin, Resûl b. Rıdvan ve gayruhüm.