İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 945 Hüküm no: 1288 Orijinal metin no: [144a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hüseyin’in Agop v. Avanos’daki kira vs. alacağını tecil ettiği Mahmiye-i İstanbul’da Odabaşı çarşısı kurbunda İbrahim Çavuş mahallesi sâkinlerinden Kuloğlanı Mehmed Çelebi b. Hüseyin meclis-i şer‘-i hatîr-i lâzımü’t-tevkīrde mahalle-i mezbûrda vâki‘ bakkal dükkânında müste’ciri olan Agop v. Avanos nâm zimmî muvâcehesinde takrîr-i kelâm edip merkūm Avanos zimmetinde sâbıku’z-zikr dükkân ücretinden kusûr dört bin akçe ve karz-ı şer‘îden yedi bin akçe ve fındık ve üzüm ve sâir bakkal emti‘ası semenlerinden on bin akçe cem‘an, yirmi bir bin akçe hakkım olup hâlâ meblağ-ı mezbûru merkūm Agop’dan taleb eylediğimde te’cîle tâlib olmağın târih-i kitâbdan şehr-i Ramazân gurresine dek te’cîl eylemişdir, suâl olunsun dedikde gıbbe’s-suâl mesfûr Agop cevâbında bâlâda tafsîl olunduğu vech üzre müdde‘î-i mezbûre yirmi bir bin akçe vâcibü’l-edâ deyni olduğunu bi tav‘ihî ikrâr edip târih-i kitâb şehr-i Ramazân evâilinde meblağ-ı merkūm yirmi bir bin akçeyi müdde‘î-i merkūm Mehmed Çelebi’ye edâ ve teslîme müte‘ahhid olmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelâhir sene 1074. Şuhûdü’l-hâl: El-Hâc Halil b. Osman, Mustafa Çelebi b. Sefer, Abdi Çelebi b. Hüseyin, Mehmed b. Ramazan ve gayruhüm.