İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 950 Hüküm no: 1295 Orijinal metin no: [145b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaymakam İbrahim Paşa’ya ve İstanbul, Galata, Üsküdar ve Haslar kadılıklarına, 150 lağımcı neferi temin edip süratle Belgrad Kalesi’ne ulaştırmaları fermânı Düstûr-ı mükerrem müşîr-i müfahham nizâmü’l-âlem müdebbir-i umûrü’l-cumhûr bi’l-fikri’s-sâkıb mütemmim-i mehâmmi’l-enâm bi’r-re’yi’s-sâ’ib mümehhid-i bünyânü’d-devlet ve’l-ikbâl müşeyyid-i erkânü’s-sa‘âdeti ve’l-iclâl el-mahfûf bi sunûfi avâtıfi’l-meliki’l-a‘lâ Âsitâne-i sa‘âdetimde kāimmakām olan vezîrim İbrahim Paşa -edâmallâhu te‘âlâ iclâlehû- ve ekāzîi kuzâti’l-müslimîn evâlîi vülâti’l muvahhidîn me‘âdinü’l-fezâil ve’l-yakīn vârisü’l-ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în el-muhtassûn bi mezîdi inâyeti’l-meliki’l-mu‘în İstanbul ve Galata ve Hâslar ve Üsküdar kadıları -zîde fazluhûm- tevkī‘-i refî‘-i hümâyûn vâsıl olıcak ma‘lûm ola ki bundan akdem sefer-i hümâyûnum için İstanbul ve Galata ve Üsküdar ve Hâslar kadılıklarında her sene iki yük seksen dokuz bin akçe lağımcı bedelleri tahsîl oluna gelip lâkin işbu sene-i mübârekede evvel-i bahâr-ı huceste-âsârda a‘dâ-yı dînden kemâ yenbağī intikām almak ve serhadd-i İslâmiye’ye karîb küffâr-ı dûzah-karâr yedlerinde olan kal‘aları kal‘ ve kam‘ eylemek tebeyyün ile sefer-i hümâyûnum mukarrer ve muhakkak olmağla sefer-i hümâyûnum için sâir seneden ziyâde lağımcı tedârük ve ihrâcı lâzım gelmeğin zikr olunan kadılıklardan mukaddemâ bedelleri tahsîl olunu gelen yerlerden beher sene sefer-i hümâyûnuma lâzım ve irsâl olunu gelen tüccârlardan taraf-ı mîrîden verilen ücretlerinden gayrı bu sene tüccârlardan Belgrad tarafından tedârük olunmağla tüccârân imdâdıyla ma‘an güçlü ve kuvvetli lağım ahvâlini bilir ekserî Ermeni tâifesinden olmak üzre aynı yüz elli nefer lağımcıları mi‘mârbaşı Mustafa -zîde mecduhû- ma‘rifetleriyle mu‘accelen ihrâc edip ve yarar yerli yerinden ve her bir küfelâsıyla defter edip içlerinden her yirmi neferine bir bölükbaşı ve cümlesine bir lağımcı başı ta‘yîn edip irsâl olunan mübâşir ve lağımcıbaşı ve zimmeti ile ma‘an ber vech-i ta‘cîl mahrûse-i Belgrad’a irsâl ve nevrûzdan mukaddem ordu-yı hümâyûnuma teslîm ettirmeniz bâbında fermân-ı âlî-şânım sâdır olmuşdur. Buyurdum ki hükm-i şerîfimle vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip vech-i meşrûh üzre zikr olunan kadılıklardan mukaddemâ lağımcı bedeli tahsîl olunu gelen yerlerden ve her sene sefer-i hümâyûnuma irsâl olunu gelen tüccârân imdâdıyla ma‘an ol mikdâr nefer güçlü ve kuvvetli ve lağım ahvâli bilir Ermeni tâifesinden olmak üzre ol mikdâr nefer lağımcıları mûmâ-ileyh mi‘mârbaşı ma‘rifetleriyle mu‘accelen ihrâc ettirip ve yarar yerli kefîllerin alıp ve defter edip defteri ve lağımcıbaşı ve mübâşiri ile ma‘an ber vech-i ta‘cîl mahrûse-i Belgrad’a irsâl ve nevrûzdan mukaddem ordu-yı hümâyûnuma teslîm ettirip ihmâl ve müsâhele eylemeyesiz. El-hâsıl lağımcı husûsu sefer-i hümâyûnumun ziyâde ehemmindendir ana göre mukayyed olup fermânım üzre güçlü ve kuvvetli ve lağım ahvâlini bilir lağımcı ihrâc ve bi’t-tamâm teslîm ettirip marîz ve sabî ve mecnûn ve amel-mânde olmakdan be gāyet ihtirâz eyleyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâbi‘ aşer şehri Cemâziyelevvel sene erba‘a ve seb‘în ve elf. Mahmiye-i medîne-i Belgrad Mûcebince mahalline kayd olunmak [üzre] buyruldu.