İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 952 Hüküm no: 1297 Orijinal metin no: [146a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ketecizâde İbrahim Efendi’nin vârisi olan kızı Fâtıma’nın Hüseyin Bey b. Mustafa’yı vekil tayin ettiği Sebeb-i tahrîr-i kitâb-ı naklî ve mûceb-i tastîr-i hitâb-ı hükmî oldur ki fi’l-asl medîne-i Gelibolu sâkinlerinden olup bundan akdem cezîre-i Midilli’de sâkin iken fevt [olup], terekesi cezîre-i mezbûrede emîn-i beytülmâl yedinde mazbût olan Ketecizâde İbrahim Efendi’nin sulbiye kızı olup mahmiye-i İstanbul’da Muhsine Hâtun mahallesi sâkinelerinden Fâtıma nâm hâtundan şuhûduna âti’l-beyân vechi üzre da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i müslimînden olup mahmiye-i mezbûrede Ali Paşa-yı Atîk mahallesi sâkinlerinden Müezzin el-Hâc Mustafa b. el-Hâc Rıdvan b. Osman ve Hamza b. Mehmed b. Hamza nâm kimesneyi nakl ve tahvîl için mahall-i cerh ve ta‘dîle li ecli’ş-şehâde hâzırân olup müsteşhide-i mezbûre Fâtıma Hâtun müteveffâ-yı mezbûr Ketecizâde İbrahim Efendi’nin sulbiye kızıdır, vâlidesinin adı Elif nâm hâtun ve maskat-ı re’si Rumeli’de Osman nâm karyedir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra müteveffâ-yı mezbûr Ketecizâde İbrahim Efendi’nin mezbûrede emîn-i beytülmâl yedinde mazbûta olan menzil? hissesini taleb ve da‘vâ ve ahz u kabz ve kendiye îsâle ve kezâlik müteveffâ-yı mezbûrun terekesinden olup medîne-i Gelibolu’da olan lede’l-ahâlî ve’l-cîrân ma‘lûmü’l-hudûd menzil ve dükkân hissesini taleb ve da‘vâ ve ahz u kabz ve ba‘de’l-ahz dükkânı bey‘a ve ba‘de’l-izin menzili bey‘a ve semenlerini ahz ve kendiye îsâle ve ahz ve îsâl ve mütevakkıf olduğu umûrun cümlesine işbu nâkilü’l-kitâb Hüseyin Bey b. Mustafa’yı tarafından vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve merâsimini edâya müte‘ahhid olmağın mâ vaka‘a bi’t-taleb ketb olundu. Hurrire fi’l-yevmi’l-hâdî aşer min Cemâziyelâhir sene 1074.