İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 952 Hüküm no: 1298 Orijinal metin no: [146a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul kadısına, Belgrad’a kasaplar gönderilmesi fermânı Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîde fezâilühû- tevkī‘-i refî‘-i hümâyûn vâsıl olıcak ma‘lûm ola ki kıdvetü’l-emâcid ve’l-a‘yân bi’l-fi‘l ordu-yı hümâyûnumda koyun emîni olan Ahmed zîde mecduhû mahrûse-i Belgrad’da Dersaâdet’ime arzuhâl sunup inşâ’allâhü te‘âlâ evvel-i bahârda sefer-i hümâyûnuma gelip erişmek üzre mahrûse-i İstanbul ehl-i hırefinden ihrâcı fermân olunan ordudan kasaplar hırfeti bana teslîme ve benim ma‘rifetimle ordu-yı hümâyûnda hizmet edegeldikleri kānûn-ı kadîm olmağla kasaplar hırfeti olugeldiği üzre tarafımdan irsâl eylediğim adama teslîm ve ber vech-i ta‘cîl ordu-yı hümâyûna irsâl ettirmek bâbında emr-i şerîf verilmek ricâ ederim deyû bildirdiği ecilden, imdi mahmiye-i İstanbul’da işbu sene-i mübârekede mükemmel ihrâcı fermânım olan ordudan kasaplar hırfeti kānûn-ı kadîm üzre emîn-i mezbûrun âdemisi ile ber vech-i ta‘cîl ordu-yı hümâyûnuma irsâl ve teslîm ettiresiz deyû fermânım olmuşdur. Buyurdum ki şerîfimle ( ) vardıkda, bu bâbda sâdır olan emrim üzre amel edip dahi mahmiye-i mezbûreden ihrâcı fermânım olan mükemmel ordu hıreflerinden kasaplar ordusu hırefi kānûn-ı kadîm üzre emîn-i mezbûrun âdemisiyle ber vech-i ta‘cîl ordu-yı hümâyûnuma irsâl ve vakt ü zamânıyla teslîm ettirip kimesneye te‘allül ve nizâ‘ ettirmeyesiz, şöyle bilesiz alâmet-i şerîfe i‘timâd kılasız. Tahrîren fi’l-yevmi’r-râbi‘ ve’l-ışrîn min şehri Cemâziyelevvel sene erba‘a ve seb‘în ve elf. Be-makām-ı mahrûse-i Belgrad.