İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 955 Hüküm no: 1301 Orijinal metin no: [147a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhsine Hâtun vakfına Abdülbâki b. Abdullah’ın mütevellî olduğu Mâ fîh kemâ …? fîh harrerehu’l-fakīru’llâhi te‘âlâ Ahmed b. Mehmed el-müvellâ hâlâ bi medîne-i Kostantıniyye -ufiye anhâ-. Mahmiye-i İstanbul’da vâki‘ merhûme Muhsine Hâtun vakfına hâlâ berât-ı sultânî ile mütevellî olan Abdülbâkī b. Abdullah nâm kimesne meclis-i şer‘-i şerîfde sâbıkan vakf-ı mezbûra mütevellî olan el-Hâc Osman Bey b. Abdullah mahzarında ikrâr ve takrîr-i kelâm edip mezbûr el-Hâc Osman Bey târih-i kitâb gurresine gelince vakf-ı mezbûra mütevellî iken malın bi şarti’r-rücû‘ vakfın ta‘mîrine ber mûceb-i defter sarf eylediği hesâb olunup seksen bin akçe harc ve masraf ettiği zâhir ve mütebeyyin olmağla meblağ-ı mezbûrdan on dokuz bin akçesi istîfâ ve mâ‘adâsı vakfa teberru‘ ettikden sonra mâl-ı vakıfdan yedinde zâhir olan nakid yedi yüz riyâlî guruşu tevliyyetim hasebiyle tamâmen ahz u kabz edip ve mâl-ı vakıfdan kâtib-i vakıf olan es-Seyyid Ali Efendi zimmetinde olan otuz yedi buçuk guruş ve duvarcı zimmî zimmetinde olan on iki buçuk riyâlî guruşu dahi mezbûrândan ba‘de’l-ihâle tevliyyetin kabûl eyledim ba‘de’l-yevm vakf-ı mezbûrun asl-ı mâlından ve gallesinden mezbûr el-Hâc Osman Bey yedinde ve zimmetinde bir akçe ve bir habbe bâkī kalmamışdır dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Hurrire fi’l-yevmi’s-sânî ve’l-ışrîn min Recebi’l-ferd li sene semân ve mi’e ve elf. Şuhûdü’l-hâl: Es-Seyyid Şeyhî Efendi b. es-Seyyid Mirza el-hatîb, Mehmed Efendi b. Sefer el-İmâm, Mehmed Çelebi b. Mustafa el-Müezzin, Hüseyin Çelebi b. İsmail müezzin-i sânî, Halil Efendi b. ( ) el-câbi, es-Seyyid Ali Efendi b. Seyyid Mehmed, el-Hâc İbrahim b. İsmail, Ahmed b. Mustafa …cı?, eş-Şeyh Mehmed Efendi ve gayruhüm.