İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 956 Hüküm no: 1302 Orijinal metin no: [147a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Çelebi b. Arslan’ın vakıf arsa üzerine yaptırdığı keresteci dükkanının keşfi El-emrü hasbemâ hurrire fîhi nemekahu’l-fakīr ileyhi Sübhânehû ve te‘âlâ Ali b. İbrahim el-me’mûr bi’l-keşfî min kıbeli men lehü’l-emr -ufiye anhümâ-. Mahmiye-i Kostantıniyye’de el-Hâc İsâ mahallesinde sâkin işbu bâ‘isü’l-kitâb Osman Çelebi b. Arslan nâm kimesne meclis-i şer‘de takrîr ve ta‘bîr ani’l-merâm edip mahalle-i mezbûrede vâki‘ bir tarafdan cidâr-ı hısn ve bir tarafdan Haçik v. Toros nâm Ermeni mülkü ve bir tarafdan Çizmeci Murad v. ( ) nâm Ermeni mülkü ve bir tarafdan tarîk-i âma müntehî arsanın bennâ zirâ‘ıyla tûlen on bir zirâ‘ ve arzen altı zirâ‘ olup beher sene altmışar akçe mukāta‘a ile taraf-ı mîrîden Mustafa Ağa nâm kimesne ahz u kabz edip ve bir mikdârını babam ile karındaşım Mehmed Efendi’den alıp ve yine tûlen ve arzen altışar zirâ‘ olup beher yevm üç akçe icâre ile Gāzi Ali Paşa vakfının mütevellîsi olan İbrahim nâm kimesne bana tefvîz ve ferâğ edip ben dahi mukābele-i ferâğda üç yüz esedî guruş verip mezbûr İbrahim vakf-ı mezbûr için meblağ-ı mezbûru ba‘de’l-ahz zikr olunan arsanın üzerine ben dahi kendi malım ile tabaka-i ulyâda dört bâb oda ve tabaka-i vustâda bir matbah ( ) ve tabaka-i süflîde bir keresteci dükkânı binâ eyledim idi. Üzerine varılıp ber mûceb-i şer‘ tahmîn olunmak matlûbumdur dedikde kıbel-i şer‘den Mevlânâ Cafer Efendi irsâl olunup ol dahi Hâssa mi‘mârlardan Devlet Halîfe ve zeyl-i kitâbda mastûrü’l-esâmî müslimîn ile mahall-i mezbûre varıp mi‘mâr-ı merkūm mütevellî-i mezbûr İbrahim ile merkūm Mustafa Ağa mahzarlarında ba‘de’l-keşf ve’n-nazar, fi’l-vâki‘ vakf-ı mezbûrun nukzundan bir şey olmayıp toprağına dahi vaz‘-ı yed etmeyip cümle kendi malıyla binâ eylediği mezbûr Osman Çelebi’nin zimmetinde olmağın ber vech-i meşrûh binâ olunan odaların ve sâirin kereste ve üstâdiyye ve mühimmâtı ancak üç yüz elli bin akçe ile hâsıl olur, andan eksik olmaz deyû tahmîn-i sahîh ile tahmîn edip mezbûr mi‘mâr ile sâir vukūfu olan kimesneler dahi haber verdiklerinden sonra gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû meclis-i şer‘-i şerîfe gelip ihbâr etmeğin mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr sene ihdâ ve sittîn ve elf. Şuhûdü’l-hâl: Osman Efendizâde Mehmed Efendi el-İmâm, Süleyman Beşe el-Mübâşir, Halil Çelebi el-bakkal, Mehmed Çelebi Yedekçi, Hüseyin Çelebi, Ali Beşe kethüdâ.