İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 957 Hüküm no: 1304 Orijinal metin no: [147b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Ağa vakfı mütevellîyeliğinin Beyhan Hâtun’da olduğu Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki müteveffâ Kasım Ağa’nın kızı dârende-i fermân-ı hümâyûn Beyhan nâm hâtun dergâh-ı mu‘allâma gelip vâkıf-ı mezbûrun aslah evlâdından olup İstanbul’da vâki‘ Kasım Ağa binâ eylediği çeşme evkāfının yevmî iki akçe ile vazîfe ile evlâdı ve meşrûtiyyet üzre mütevellîsi iken, hemşîresi ( ) nâm hâtun alıp dahl etmekle mezbûra def‘ olunup tevliyyet-i mezbûr ber mûceb-i şart-ı vâkıf kendiye ibkā mukarrer kılınıp, mâliye tarafından berât-ı şerîfim verilmekle elinde olan mâliye berâtı mûcebince zabt ettirilmek bâbında inâyet ricâ etmeğin elinde olan mâliye berâtı mûcebince zabt ettirilmek emrim olmuşdur buyurdum ki emrim üzre tevliyyet-i mezbûru mezkûre hâtun elinde olan berâtı mûcebince şart-ı vâkıf üzre kemâ-kân zabt ve tasarruf ettirip min ba‘d hemşîresi mezbûreyi ve taraf-ı âhardan bir ferdi dahl ve ta‘arruz ettirmeyesin ve dahl edip hizmeti mukābelesinde kendiye âid olan nesnesin almışlar ise ba‘des-sübût hükm edip geri bî-kusûr alıveresin, şöyle bilesin alâmet-i şerîfe i‘timâd kılasın. Tahrîren fî evâhiri şehri Ramazâni’l-mübârek sene 1073. Be-makām-ı Edirne el-mahrûse.