İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 958 Hüküm no: 1305 Orijinal metin no: [147b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Ağa vakfı mütevellîyeliği için Beyhan Hâtun’a berat verildiği Nişân-ı şerîf-i âlî-şân-ı sâmî-mekân-ı sultânî ve tuğrâ-yı garrâ-yı cihân-sitân-ı hâkānî hükmü oldur ki aslah-ı evlâddan olup mahmiye-i İstanbul’da Kasım Ağa binâ eylediği çeşme evkāfına yevmî iki akçe vazîfe ile mütevellîye olan işbu râfi‘-i tevkī‘-i refî‘ü’ş-şân-ı şehriyârî Beyhan nâm hâtun evlâdiyyet ve meşrûtiyyet üzre mutasarrıfe iken, hemşîresi ( ) nâm hâtun bî-vech alıp gadr etmeyle ref‘ olunup ber mûceb-i şart-ı vâkıf geri kendiye ibkā ve mukarrer kılınmak bâbında inâyet ricâ eylemeğin, hakkında mezîd-i inâyet-i pâdişâhânem vücûda getirip ru’ûs-ı hümâyûnum sûreti mûcebince bin yetmiş üç Ramazân’ının on beşinci gününden ibkā ve mukarrer edip bu berât-ı hümâyûnu verdim ve buyurdum ki mezbûre Beyhan Hâtun ber mûceb-i şart-ı vâkıf kemâ-kân mütevellîye olup hizmet-i lâzımesin mer‘î ve mü’eddâ kıldıkdan sonra bundan evvel ne vechile zabt edegelmiş ise geri ol minvâl üzre yevmî iki akçe vazîfesin evkāf-ı mezbûre mahsûlünden alıp mutasarrıf ola, ol bâbda def‘ olunan hemşîresi ( ) hâtun ve âhardan bir ferd dahl u ta‘arruz kılmaya, şöyle bileler alâmet-i şerîfe i‘timâd kılalar. Fi’l-yevmi’s-sânî aşer min şehri Ramazâni’l-mübârek sene 1073. Be-makām-ı Edirne el-mahrûse.