İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 958 Hüküm no: 1306 Orijinal metin no: [147b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo ile Mirkelamoğlu arasındaki alacak davasının Edirne Dîvânı’nda görülmesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîdet fezâilühû-’ya tevkī‘-i refî‘-i hümâyûn vâsıl olıcak ma‘lûm ola ki Hâssa sögilerden? Yorgo nâm zimmî dergâh-ı mu‘allâma arzuhâl edip mahrûse-i mezbûre sâkinlerinden olup Mîrkelâm oğlu demekle ma‘rûf kimesne ile otuz seneden mütecâviz kazâ-i mezbûrda sâkin olmağla bu âna gelinceye değin bundan bir şey da‘vâ etmeyip ve mezbûra şer‘an deyni yok iken hâliyâ bundan altı bin yüz guruşu da‘vâ ve taleb edip bi’l-fi‘l Âsitâne-i sa‘âdet’imde düstûr-ı mükerrem müşîr-i müfahham nizâmü’l-âlem vezîrim ve kāimmakāmım olan İsmail Paşa -edâmallâhu te‘âlâ iclâlehû-nun huzûrlarında mürâfa‘a-i şer‘î-i şerîf olduklarında otuz iki yıllık da‘vâ olmak ma‘raz-ı şirret? olduğu zâhir ve nümâyân olmağla şer‘an cevâb verilip ba‘dehû mezbûr zimmî matbah-ı âmirem hizmetinde olmağla bu cânibe geldikde ol cânibde evi mühürlenip ziyâde zulm ve te‘addî olduğun bildirip emr-i şerîfim ricâ etmeğin mezbûr zimmî hâliyâ Edirne’de olmağla ma‘rifet-i şer‘le hânesi açılıp hasm-ı merkūm [ile] Dîvân-ı Edirne’ye mürâfa‘aya havâle olunmak bâbında fermân-ı âlî-şânım sâdır olmuşdur buyurdum ki kāimmakāmım adamlarından olan kıdvetü’l-emâsil ve’l-akrân Mehmed -zîde kadruhû- hükm-i şerîf-i vâcibü’l-ittibâ‘ımla vusûl buldukda, bu bâbda sâdır olan fermân-ı celîlü’l-kadrim mûcebince amel edip dahi bir def‘a şer‘le görülüp fasl olmuş değil ise tamâm hak ve adl üzre tefahhus edip göresin, arz olunduğu üzre ise ol bâbda muktezâ-yı emr-i şer‘-i kavîmle amel edip dahi ma‘rifet-i şer‘le hânesi açılıp ve hasm-ı mezbûru Dîvân-ı Edirne’ye havâle eylesin ki mezbûr gelip ahvâlleri Dîvân-ı hümâyûnumda şer‘le görülüp kimesneye zulm olmaya, şöyle bilesin alâmet-i şerîfe i‘timâd kılasın. Tahrîren fî evâsıtı şehri Zilka‘deti’ş-şerîfe sene selâse ve seb‘în ve elf. Be-makām-ı mahrûse-i Edirne.