İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 960 Hüküm no: 1312 Orijinal metin no: [148a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul kadısının münasip olan câmilerde Pazartesi ve Perşembe günleri zafer için toplu dualar yaptırması Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki Hak sübhânehû ve te‘âlâ celle celâlühû ve âmme nevâlühû hazretlerinin bir mûr-ı za‘îf ve bir abd-ı nâ-tuvân-ı nahîf olup feth ve teshîr-i kılâ‘ (…) kahr ve tedmîr-i e‘âdî-i dalâlet-nihâd emrinde kılıca dayanıp ve ne hod askerime i‘timâd eyleyip (…) ber muktezâ-yı fehvâ-yı fe izâ azzemte fe tevekkel ale’llah ve ber muktezâ-yı mazmûn-ı nusret-ihtivâ-yı ve mâ’n-nasru illâ min ındillâhi hazret-i rabbü’l-âlemîn -azzet esmâuhû-nun ulüvv-i inâyetine tevekkül ve i‘timâd ve server-i kâ’inât -aleyhi efdalü’s-salâtin mu‘cizât-ı kesîretü’l-berekâtına tevessül ve istinâd eyleyip (…) ve sâir sahâbe-i güzîn-i izzet-temkîn -rıdvânullâhi te‘âlâ aleyhim ecma‘în- ervâh-ı mukaddeselerinden istimdâd eylemek üzre ve câhidû fî sebîlillâhi hakka cihâdihî emrine imtisâlen küffâr-ı hâksâr üzerine asâkir-i nusret-şi‘âr irsâl olunmuşdur. Hazret-i fettâh-ı zü’l-metn tekaddeset âlâ’uhû ve tetâbe‘at na‘amâühû dergâhından ricâ olunur ki bu mekāsıd-ı celîlenin ibtidâsı mübârek ve meymûn ve intihâsı envâ‘-ı fütühât-ı cemîle-i mu‘allâsı ve makrûn olmuş ola, öyle olsa âdet-i kadîme üzre asâkir-i zafer-rehber ki feth ü nusrete ve küffâr-ı hâksârın zül ve nekbeti için her haftada iki gün cevâmi‘-i şerîfede ale’s-seher cemî‘ ulemâ ve sulehâ ve meşâyih ve fukarâ ve etfâl ve sıbyân ile cenâb-ı kibriyâ ve kâr-sâzdan tazarru‘ ve niyâz olunmak ehemm-i mühimmât-ı dîn ü devletden olmağın gerekdir ki hâliyâ asâkir-i zafer-encâm hudûd-ı memâlik-i küffâr-ı dûzah-karâra karîb mahalle dâhil olmağla ve inşâ’allâhü te‘âlâ mansûr ve muzaffer asâkir-i fevz-me’âsir avdet edince mahrûse-i mezbûrede münâsib olan cevâmi‘-i şerîfede mu‘tâd-ı kadîm üzre her hafta isneyn ve hâmis cemî‘ ulemâ ve sulehâ ve meşâyih ve etfâl ve sıbyân ile cem‘iyyet eyleyip ve sıbyânın başların açtırıp ricâ ve niyâz ettireler ve ellerin kaldırdıp dergâh-ı kādi’l-hâcâta envâ‘-ı huşû‘ ve inkıyâd ve esnâf-ı hudû‘ ve inkisâr ile tazarru‘ ve münâcât ve du‘â-yı icâbet-âyât ettireler. Ümiddir ki ulemâ ve sulehâ ve aceze ve fukarânın husûsan ism ve ma‘siyetden müberrâ olan etfâl ve sıbyânın ihlâs ve meskenete makrûn olan du‘â ve niyâzları berekâtıyla etrâf ve eknâfda olan küffâr-ı hâksâr ve sâir e‘âdî-i dîn ü devlet makhûr olup asâkir-i İslâm mansûr ve muzaffer olmak müyesser ve mukadder olmuş ola. Tahrîren fî evâili Zilhicceti’ş-şerîfe li sene selâse ve seb‘în ve elf. Be makām-ı Edirne el-mahrûse. Vasale ileynâ fi’l-yevmi’l-hâmis min Zilhicce sene 1073.