İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 961 Hüküm no: 1313 Orijinal metin no: [148a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meslek sahiplerinin verdikleri paranın kaçırıldığı ve İstanbul kadısınn aynı meblağı tahsil edip süratle orduya göndermesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-mu‘în İstanbul kadısı -zîde fezâilühû- tevkī‘-i refî‘-i hümâyûn vâsıl olıcak ma‘lûm ola ki bundan akdem bin yetmiş üç senesinde sefer-i hümâyûnum için İstanbul tarafından ihrâc ve rûz-ı Kasım’a değin edâ-i hizmet üzre ordu-yı hümâyûnuma irsâl ve orduculardan ehl-i hırefde olan Berber Ali [ve] üç bin beş yüz [akçe] alan Berber Hüseyin ve yine üç bin beş yüz akçe [alan] ( ) nâm kimesneler, rûz-ı Kasım gelmezden mukaddem itmâm-ı hizmet etmeden bilâ-izin firâr eylemeleri ile mukaddemâ ehl-i hıref mâbeynlerinde kendilerine edâ-i hizmet için verilen ol mikdâr akçeyi taraf-ı mîrîden tahsîl [ve] ber vech-i ta‘cîl ordu-yı hümâyûna irsâl ve ve teslîm-i hazîne ettirilmek fermânım olmuşdur. Buyurdum ki hükm-i şerîfimle vardıkda bu bâbda sâdır olan emrim üzre amel edip kat‘â te’hîr ve tevakkuf eylemeyip edâ-i hizmet etmeyip firâr ve rûz-ı Kasım’a değin ordu-yı hümâyûnda mezbûrların edâ-i hizmeti için ehl-i hırefden aldıkları ol mikdâr akçe taraf-ı mîrîden mu‘accel taleb ve tahsîl ettirip keseleyip ve mühürleyip mübâşir-i mezbûr ile ve mu‘temedün-aleyh âdemler ile ber vech-i ta‘cîl ordu-yı hümâyûnuma irsâl ve teslîm-i hazîne ettirip zimmetlerinde bir akçe bâkī kodurmayasın, şöyle bilesin alâmet-i şerîfe i‘timâd kılasın. Hurrire fi’l-yevmi’s-sâbi‘ min Cemâziyelevvel sene erba‘a ve seb‘în ve elf. Be-makām-ı medîne-i Belgrad.