İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 963 Hüküm no: 1316 Orijinal metin no: [148b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vâlide Sultan câmii başhalifesi Dimitri’ye Eflak ve Boğdan beyleri tarafından günlük ikişer vakıyye et verilmesi Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-mu‘în Mevlânâ İstanbul efendisi -zîdet fazluhû- tevkī‘-i refî‘-i hümâyûn vâsıl olıcak ma‘lûm ola ki Dimitri nâm zimmî Dersaâdet’ime arzuhâl edip seyyidetü’l-muhadderât tâcü’l-mestûrât zâtü’l-izzü ve’s-sa‘âdet Vâlide Sultân -dâmet ismetühâ-’nın müceddeden binâ eylediği câmi‘-i şerîfin baş halîfesi olup kubbesi tamâm oldukda, hizmetim mukābelesinde Boğdan Beyi tarafından yevmî iki vakıyye et ve Eflak beyi tarafından iki vakıyye et verilmek bâbında emr-i şerîfim verilmek ricâ ederim deyû bildirdiği ecilden, imdi vech-i meşrûh üzre ikişer vakıyye et verilmek emr edip buyurdum ki hükm-i şerîfim vardıkda bu bâbda sâdır olan emrim üzre amel edip dahi mezbûr zimmîye vech-i meşrûh üzre hizmeti mukābelesinde Eflak ve Boğdan beyleri tarafından yevmî ikişer vakıyye et ta‘yîn olmağla hizmeti mukābelesinde vech-i meşrûh üzre ta‘yîn olunan ikişer vakıyye etin âdemlerinden alıverip te‘allül ve nizâ‘ ettirmeyesin, şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâdis min şehri Zilhicceti’ş-şer‘iyye sene selâse ve seb‘în ve elf. Be-makām-ı Kostantıniyye el-mahrûse.