İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 962 Hüküm no: 1315 Orijinal metin no: [148b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Akseki mahallesi avârız vakfı eski mütevellîsi Hasan b. Mahmud’un zimmetini ibrâ ederek yeni mütevellî Yusuf’a vakfı teslim ettiği El-emrü hasbemâ hurrire-fîhi harrerehu efkarü’l-verâ ileyhi Sübhânehû te‘âlâ Hamîd b. Mustafa el-muhâsib bi medîne-i Kostantıniyye el-mahmiyye -gufire lehümâ-. Mahmiye-i İstanbul mahallâtından Akseki mahallesi avârızına mevkūfe nukūdun bi’l-fi‘l mütevellîsi olan Yusuf Efendi talebi ile vakf-ı mezbûrun sâbıkan mütevellîsi olan işbu râfi‘ü’r-rakīm Hasan b. Mahmud zamân-ı tevliyyeti olan bin yetmiş iki senesi Cemâziyelâhiresi gurresinden bin yetmiş üç senesi Cemâziyelâhiri gāyetine gelince olan on bir aylık muhâsebesi görüldükde, mezbûr Hasan’ın asl-ı mâl-ı vakf-ı mezbûrdan (..?) yüz on bir akçe hesâbınca yedişer dirhem beş yüz riyâlî guruş ile on yedi bin akçe ve Topal Muslu (..?) mu‘accelesinden dahi hesâb-ı mezbûr üzre yüz yirmi guruş ve müeccelâtından dahi bin seksen akçe ve murâbahadan dokuz bin üç yüz elli akçe ki cem‘an doksan altı bin yüz seksen akçe makbûzu ve târih-i mezbûrda mahalle-i merkūmenin avârız ve sâir mesârif-i mu‘ayyenesine yedi bin altı yüz yetmiş akçe harc ve sarf olup bâkī seksen sekiz bin beş yüz on akçenin altı bin akçesi Gevher nâm hâtun zimmetinde olmağla mahallinden gösterip ve yine yüz onar akçe hesâbı üzre yedi yüz (..?) ile üç bin doksan akçe ki cem‘an seksen iki bin beş yüz on akçesini dahi der-kîse mütevellî-i mezbûr Yusuf Efendi’ye teslîm eyledikden sonra mezbûr Yusuf Efendi meclis-i şer‘-i hatîrde mezbûr Hasan mahzarında bi’t-tevliyye ikrâr ve takrîr-i kelâm edip mezbûr Hasan bâlâda zikr olunduğu üzre zamân-ı tevliyyetinde mesârifden mâ‘adâ zimmetinde zuhûr eden seksen sekiz bin beş yüz on akçenin vech-i muharrer üzre altı bin akçesi Gevher hâtun zimmetinde olmağla mahallinden bana gösterip ve bâkī (..?) beş yüz on akçesini dahi nakid der-kîse teslîm ben dahi kabûl ve kabz ve tesellüm edip ol vechile mezbûr Hasan zimmetinde bir akçe ve bir habbe bâkī kalmadı dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem sene selâse ve seb‘în ve elf. Şuhûdü’l-hâl: El-Hâc İsmail b. Mehmed Efendi, Mehmed Ağa b. Sefer, Ali Çavuş b. Ramazan, Mehmed Çelebi b. Ali, Mustafa b. Hasan, Receb b. Murad, Tevekkül? b. Murad.