İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 73 Hüküm no: 8 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. el-Hâc Mehmed’in mirasını alan Nâme bt. Musa’nın akrabalık bağı dolayısıyla Musa Efendi’ye düşen kısmı teslimi Mahmiye-i İstanbul’da Mimar Kemal mahallesinde sâkin bâ‘is-i hâze’l-kitâb Musa Efendi b. Ebûbekir nâm kimesne meclis-i şer‘-i şerîfde vilâyet-i Anadolu’da medîne-i İznikmid İmâret mahallesinde sâkine Nâme bt. Musa nâm hâtun mahzarında üzerine takrîr-i da‘vâ ve tasdîr-i müdde‘â edip medîne-i mezbûrede el-Hâc Hasan mahallesinde sâkine iken târih-i kitâbdan bir buçuk sene mukaddem vefât eden Ayşe bt. el-Hâc Mehmed nâm hâtunun babası mezbûr el-Hâc Mehmed’in ben li ebeveyn ammisi Ahmed nâm kimesnenin oğlunun oğlu olup zirâ‘ benim babam mezbûrların babası mezbûr Ahmed ile müteveffât-ı mezbûrenin babası mezbûr el-Hâc Mehmed’in babası Süleyman nâm kimesne li ebeveyn karındaşlar olup babaları ismi Mustafa ve dedeleri ismi Musa ve maskat-ı re’sleri Üsküdar kazâsı müzâfâtından Taşköprü nâhiyesine tâbi‘ Evrenez nâm karyedir. Müteveffât-ı mezbûrenin verâseti ber vech-i muharrer usûbet-i nesebiyye cihetinden bana ve kezâlik müteveffât-ı mezbûrenin babası el-Hâc Mehmed’in dahi li ebeveyn ammisi Balkaya nâm kimesnenin oğlu Mehmed’in oğulları Osman ve Mustafa ve Hasan nâm kimesnelere münhasıra iken, mezbûre Nâme Hâtun müteveffât-ı mezbûrenin li ebeveyn hâli diğer Musa nâm kimesnenin kızı olmağla vârisesi olmak zu‘muyla terekesine vâzı‘atü’l-yed olmağın hâlâ mezbûr Nâme Hâtun’a suâl olunup makbûzu olan tereke-i müteveffât-ı mezbûreden bi’l-irsi’ş-şer‘î bana isâbet eden hisse-i şer‘iyyemin alıverilmesi matlûbumdur dedikde gıbbe’s-suâl mezbûre Nâme Hâtun cevâbında fi’l-hakīka müteveffât-ı mezbûrenin ber vech-i muharrer li ebeveyn hâlinin kızı olup ve tereke-i müteveffât-ı mezbûreye vâzı‘atü’l-yed olduğunu ikrâr, lâkin müdde‘î-i mezbûrun minvâl-i muharrer üzre verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup nâhiye-i mezbûreye tâbi‘ Bâli nâm karye ahâlîsinden olup mahmiye-i mezbûrede Sultan Süleyman Hân câmi‘-i şerîfi kurbunda mülâzımîn odalarında sâkin Hüseyin Efendi b. Hasan ve Hacısular nâm karye ahâlîsinden Yunus b. Süleyman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Musa Efendi b. Ebûbekir müteveffât-ı merkūme Ayşe Hâtun’un babası mezbûr el-Hâc Mehmed b. Süleyman’ın li ebeveyn ammisi oğlu olup zirâ‘ mezbûr el-Hâc Mehmed’in babası merkūm Süleyman müdde‘î-i mezbûrun babası merkūm Ebûbekir’in babası merkūm Ahmed ile li ebeveyn karındaşı olup babaları ismi Mustafa ve dede[leri] ismi Musa ve vâlideleri ismi Fâtıma ve maskat-ı re’sleri zikr olunan Evrenez nâm karyedir, müteveffât-ı mezbûrenin verâseti müdde‘î-i mezbûr ile müteveffât-ı mezbûrenin babasının âhar li ebeveyn ammisi merkūm Balkaya’nın oğulları ve kezâlik usûbet-i nesebiyye cihetlerinden vârisleri olan mezbûrûn Osman ve Mustafa ve Hasan nâm kimesneler[e] münhasıradır gayrı vârisi ve terekesine müstahıkk-ı âhar olduğu ma‘lûmumuz değildir hâlâ müdde‘î-i mezbûr için mûrisesi müteveffât-ı mezbûre Ayşe’nin terekesine vâzı‘atü’l-yed olan mezbûre Nâme Hâtun’dan ve sâir vâzı‘ü’l-yed olanlardan bi’l-irsi’ş-şer‘î kendiye isâbet eden hisse-i şer‘iyyesini hakk-ı taleb ve ahz vardır, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükmi’ş-şer‘î makbûz olan tereke-i müteveffât-ı mezbûreden müdde‘î-i mezbûre isâbet eden hisse-i şer‘iyyesini def‘ ve teslîm mezbûre Nâme Hâtun’a tenbîh olmağın mâ vaka‘a bi’t-taleb ketb olundu. Fi’l-yevmi’l-hâmis [5a] ve’l-ışrîn min Muharremi’l-harâm li sene seb‘a ve semânîn ve elf min hicre men lehü’l-izzi ve’ş-şeref. Şuhûdü’l-hâl: Mehmed Efendi b. Mehmed, İbrahim Çelebi b. Mehmed, Hüseyin Efendi b. Hasan, Mehmed Ağa kethüdâ-yı muhzırân, Yunus b. Süleyman, Hüseyin Çelebi b. ( ). Mezbûr Musa b. Ebûbekir da‘vâ-yı mezbûreden ber mûceb-i defter-i kassâm mezbûre Nâme’nin makbûzundan hissesine isâbet eden meblağdan otuz esedî guruşa sulh olmağın bu mahalle şerh verildi. Sah.