İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 72 Hüküm no: 7 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Kaya’nın nakit vakfının eski mütevellisi Ali Çelebi’nin, kendi şahsına harcadığı parayı yeni mütevelli Halil Efendi’ye vereceği Mahmiye-i İstanbul’da Şehremini kurbunda Mustafa Çavuş mescid-i şerîfinin tilâvet olunan eczâ-i şerîfe için merhûm el-Hâc Kaya nâm sâhibü’l-hayrın nukūd-ı mevsûfuna bi’l-fi‘l mütevellî olan Halil Efendi b. Ali nâm kimesne meclis-i şer‘-i şerîfde vakf-ı mezbûre sâbıkan mütevellî olan Ali Çelebi b. Hüseyin nâm kimesne mahzarında bi’t-tevliyye üzerine takrîr-i da‘vâ ve tasvîr-i müdde‘â edip mezbûr Ali Çelebi bundan akdem vakf-ı mezbûre mütevellî iken vâkıf-ı mezbûrun ber vech-i muharrer nukūd-ı mevkūfesi olan beş yüz altmış iki buçuk riyâlî guruşu tevliyyet-i mahkiyesi hasebiyle ahz u kabz ettiğinden sonra meblağ-ı mezbûrun yirmi guruşunu mescid-i mezbûrun imâmı olan işbu hâzır bi’l-meclis Mehmed Efendi’ye bi tarîki’l-emâne teslîm ol dahi ahz u kabz edip ve bi’d-defe‘ât kırk dokuz guruş kendi yediyle ve on guruş merkūm Mehmed Efendi yediyle min haysi’l-mecmû‘ elli dokuz guruşunu vakf-ı mezbûrun kâtibi olan Halil Efendi’ye idâne ve teslîm ol dahi ahz u kabz edip üç yüz seksen üç buçuk guruşunu kendi mesârifinden sarf ile istihlâk ettiğinden sonra tevliyyet-i mezbûreden azl olunup yerine ben mütevellî nasb olunduğumda mezbûr Ali Çelebi [4b] meblağ-ı mezbûrdan ber vech-i muharrer mezbûr Mehmed Efendi’ye teslîm eylediği yüz yirmi guruş ve merkūm Halil Efendi zimmetinde olan elli dokuz guruş için beni mezbûrân Mehmed Efendi ve Halil Efendi üzerlerine cümlemiz bir arada iken rızâmız ile havâle edip ben dahi mezbûrân Mehmed Efendi ve Halil Efendi ile havâle-i mezbûreyi kabûl edip meblağ-ı mezbûreden üç yüz seksen üç buçuk guruşu zimmetinde bâkī kalmışdı hâlâ mezbûr Ali Çelebi’ye suâl olunup meblağ-ı mezbûr üç yüz seksen üç buçuk guruşun alıverilmesi matlûbumdur dedikde gıbbe’s-suâl mezbûr Ali cevâbında meblağ-ı mezbûr üç yüz seksen üç buçuk guruşun otuz iki buçuk guruşunu zimemden tahsîl ve kabzın inkâr edip ve üç yüz elli bir guruşunu kendi mesârifine sarf ile istihlâk edip zimmetimde vakf-ı mezbûre vâcibü’l-edâ ve lâzımü’l-kazâ deynimizdir deyû bi tav‘ihî ikrâr ve i‘tirâf etmeğin mûcebince ikrâr[ı] mertebesi olan meblağ-ı mezbûr üç yüz elli bir guruşunu mütevellî-i mezbûre edâya mezbûr Ali Çelebi’ye tenbîh olunup ve mütevellî-i mezbûr meblağ-ı mezbûr otuz iki buçuk guruş için beyyineye havâle olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe sene sitte ve semânîn ve elf. Şuhûdü’l-hâl: Halil b. Abdullah, el-Hâc Ahmed b. Mahmud, Mehmed Efendi el-İmâm, Hasan b. Mustafa el-Müezzin, Halil b. Mustafa, Mustafa Efendi b. Şaban el-İmâm, Nişâncı İbrahim Bey, Mustafa Ağa ve gayruhüm.