İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 75 Hüküm no: 10 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Abdullah’ın Bayram Beşe’deki alacağının vârislerine verilmesi Mahmiye-i İstanbul’da Topkapısı dâhilinde Bayezid Ağası mahallesi sâkinlerinden iken bundan akdem vefât eden Receb b. Abdullah’ın verâseti, zevce-i metrûkesi Safiye bt. Abdullah nâm hâtun ile sulbî sagīr oğlu Ahmed ve sulbiye sagīre kızı Ayşe’ye münhasır olduğu şer‘an zâhir ve mütehakkik oldukdan sonra zâtı ma‘rifet-i şer‘iyye ile ârifân Mustafa b. Ali ve Ali b. Mustafa nâm kimesneler ta‘rîfleri ile mu‘arrefe olan mezbûre Safiye Hâtun kendi tarafından asâleten ve sagīrân-ı mezbûrânın tesviye-i umûrlarına kıbel-i şer‘den mansûb vasîleri olmağla vesâyeten meclis-i şerîfde Bayram Beşe b. ( ) nâm kimesne mahzarında ikrâr ve takrîr-i kelâm edip zevcim müteveffâ-yı mezbûr Receb’in mezbûr Bayram Beşe zimmetinde papuç-ı mest bahâlarından üç bin dört yüz seksen beş akçe hakkı olup kable’l-ahz fevt olup meblağ-ı mezbûr merkūm Bayram Beşe zimmetinde kalmağla meblağ-ı mezbûr üç bin dört yüz seksen beş akçe[yi] bundan akdem merkūm Bayram Beşe’den taleb ve da‘vâ ettiğimde ol dahi cevâbında zikr olunan papuç-ı mest bahâlarından zimmetimde müteveffâ-yı mezbûre deynim olan meblağ-ı mezbûr üç bin dört yüz seksen beş akçenin iki bin iki yüz seksen beş akçesini müteveffâ-yı mezbûre hayâtında edâ ve teslîm ol dahi yedimden ahz u kabz edip zimmetimde ancak bin iki yüz akçesi bâkī kalmışdır deyip meblağ-ı mezbûr iki bin iki yüz seksen beş akçe dahi müteveffâ-yı mezbûre edâ ettiğini isbât eylemesi mukarrer olup sulh sagīrân-ı mezbûrân hakkında dahi her vechile enfa‘ olmağın ikrârı mertebesi olan meblağ-ı mezbûr bin iki yüz akçeyi mezbûr Bayram Beşe yedinden ba‘de’l-ahz muslihûn tavassut edip mezbûr Bayram Beşe ile beynimizde bin akçe üzerine inşâ-i akd-i sulh ettiklerinde ben dahi meblağ-ı mezbûru asâleten ve vesâyeten kabûl ve bedel-i sulh olan meblağ-ı mezbûr bin akçeyi mezbûr Bayram Beşe yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Osman b. Ömer, Veli Bey b. Mahmud, Ebûbekir? b. Hüseyin.