İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 76 Hüküm no: 11 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Yusuf ile Mehmed Bey b. Pîrî’nin alacak davası hususunda birbirlerinin zimmetlerini ibrâ edip anlaştıkları Mahmiye-i İstanbul’da Akbıyık mahallesi sâkinlerinden Ahmed Çelebi b. Yusuf nâm kimesne meclis-i şer‘-i şerîfde Pazarköyü ahâlîsinden bâ‘is-i hâze’l-kitâb Mehmed Bey b. Pîrî nâm kimesne mahzarında ikrâr ve takrîr-i kelâm edip merkūm Mehmed bin yetmiş sekiz senesi Şa‘bânı’nın yirmi yedinci günü Bezzâzistân-ı Cedîd hâricinde vâki‘ bogasici dükkânım önünde bir kese içinde dört yüz elli guruş ve bir kese içinde dahi iki yüz guruş ve yedimden iştirâ ve kabz eylediği beynimizde ma‘lûm bogasi semeninden hakkım olan kırk sekiz guruşu mezbûr Mehmed Bey’den taleb ve da‘vâ eylediğimde, ol dahi cevâbında bin altmış dokuz senesinde zikr olunan iki kese içinde olan meblağ-ı mezbûr altı yüz elli guruşu ben baban mezbûr Yusuf’a bi tarîki’l-vedî‘a teslîm ol dahi ahz u kabz ve yüz elli guruşu istihlâk edip beş yüz guruşu bâkī kaldığından sonra bin yetmiş sekiz senesi Şa‘bânı’nın yirmi yedinci günü meblağ-ı mezbûru bana teslîme baban mezbûr Yusuf tarafından seni vekîl edip sen dahi ba‘de kabûli’l-vekâle meblağ-ı mezbûru zikr olunan bezzâzistânda babana mezbûr [Yu]suf’un taht-ı icâresinde olan mahzeninden ihrâc ve meblağ-ı mezbûru beş yüz guruşu altı yüz guruş olmak üzre bana def‘ ve teslîm ben dahi altı yüz elli guruşu tamâmen ahz u kabz eyledim deyû ikrâr ettikde, hüccet dahi verip ba‘dehu birkaç def‘a huzûr-ı hakimü’ş-şer‘de mürâfa‘a olduğumuzda men‘ ve def‘ olunduğundan sonra yedime hücec-i şer‘iyye verilip ve husûs-ı mezbûr fasl ve hasm olunmağla min ba‘d istimâ‘ olunmamak bâbında evâmir-i şerîfe dahi verilmişdi deyû iki kıt‘a hüccet-i şer‘iyye ve üç kıt‘a emr-i şerîf ibrâz ettiğinden mâ‘adâ, ücret-i karzdan zimmetinde elli guruş hakkım vardır deyû da‘vâ etmekle beynimizde münâza‘ât-ı şedîde ve muhâsamât-ı ekîde vâkia olmuşdu. El-hâletü hâzihî meblağ-ı mezbûr altı yüz elli guruşa ve bogasi esmânı olan kırk sekiz guruşa müte‘allika âmme-i da‘vâdan ben mezbûr Mehmed Bey’in zimmetini ibrâ’-i âm ile ibrâ ve iskāt eyledim ve mezbûr Mehmed Bey dahi meblağ-ı mezbûr elli guruşa müte‘allika âmme-i da‘vâdan benim zimmetimi ibrâ ve iskāt eyledi dedikde merkūm Mehmed Bey mukırr-ı merkūm Ahmed Çelebi cemî‘ kelimâtında tasdîk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Çavuşbaşı Murad Ağa, Sâlih Ağa, el-Hâc Ahmed Ağa, el-Hâc Hasan Ağa, Abdülkādir Efendi b. Ebûbekir imâm-ı Zeyrek, İbrahim Ağa, Süleyman Çavuş, Salbaş Ahmed Çavuş, hamamcı Ali Efendi, Siyavuş Çavuş, Mehmed Kapudan b. Rıdvan, Yusuf Çavuş.