İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 87 Hüküm no: 27 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Sâliha’nın babasından kendisine düşen hissesini eşi hâfız Mustafa’ya satıp alacağını hibe ettiği Min mahtûmihî Husûs-ı âti’l-beyânın mahallinde tahrîr için bi’l-iltimâs savb-ı şer‘-i şerîf-i enver ve mahfil-i dîn-i münîf-i ezherden irsâl olunan Mevlânâ es-Seyyid Muharrem Efendi b. es-Seyyid İsmail Efendi mahmiye-i İstanbul’da Altıay çeşmesi kurbunda Debbâğzâde mahallesinde vâki‘ olup bundan akdem civâr-ı rahmet-i Rahmân’a giden Zeyrekzâde es-Seyyid Abdurrahman Efendi’nin benât-ı kerîmeleri umdetü’l-muhadderât zübdetü’l-muvakkarât Şerife Sâliha ve Şerife Zeyneb ve Şerife Emetullah’ın hisselerine ta‘yîn olunan menzillerine varıp zeyl-i kitâbda mastûrü’l-esâmî olan müslimîn huzûrunda akd-ı meclis-i şer‘-i mübîn eyledikde mezbûre Şerife Sâliha meclis-i ma‘kūd-ı merkūmda, hâlâ zevci olup sâbıkan Diyârbekir kadısı olan umdetü’l-mevâli’l-kirâm zübdetü’l-e‘âli’l-fihâm bâ‘is-i hâze’l-kitâb hâfız Mustafa Efendi b. Mehmed Efendi mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin üç sehimden bir sehmi benim ve iki sehmi benim karındaşlarım mezbûretân Şerife Zeyneb ve Şerife Emetullah’ın mülkü olup mahalle-i mezbûrede vâki‘ bir tarafdan zikr-i âtî Medîne-i Münevvere vakfı ve bir tarafdan ba‘zan fahrü’l-müderrisînü’l-kirâm Edincikli Mehmed Efendi tasarrufunda olan menzil ve ba‘zan ( ) nâm hâtun tasarrufunda olan menzil ve bir tarafdan ba‘zan Atike nâm hâtun tasarrufunda olan vakıf menzil ve ba‘zan Abdülhâdi Efendi merhûmun veresesi yedlerinde olan menzil ve bir tarafdan tarîk-i âm ile mahdûd olup muhavvata-i dâhiliyyesinde fevkānî ve tahtânî altı bâb oda ve bir hamam ve bir câmekân ve bir mahzen ve bir mutfak ve bir kiler ve iki bi’r-i mâ ve üç kenîf ve cüneyneyi müştemil olup ve muhavvata-i hâriciyyesinde tabaka-i ulyâsında bir bâb oda vasatında bir sagīr oda ve tarîk-i âm tarafında kezâlik bir fevkānî oda ve altında samanhâne ve bir ahır ve avluyu müştemil mülk menzilin üç sehimden bir sehm-i şâyi‘amı, bi cümleti’t-tevâbi‘ ve’l-levâhık mûmâ-ileyh hâfız Mustafa Efendi’ye tarafeynden îcâb ve kabûlü hâvî şurût-ı müfsideden ârî bey‘-i kat‘î ile dört yüz yetmiş iki guruş ve adedi nâ-ma‘lûm bir kabza fulus-ı muzî‘aya bey‘ ve teslîm edip ve tefvîz-i âti’z-zikrin sudûruna değin Medîne-i Münevvere vakfından olup icâre-i mu‘accele ve ayda on beş akçe icâre-i müeccele ile üç sehimden bir sehmi benim ve iki sehmi kız karındaşlarım mezbûretân Şerife Zeyneb ve Şerife Emetullah’ın taht-ı tasarrufumuzda olup yine mahalle-i mezbûrede vâki‘ bir tarafdan sâlifü’z-zikr menzil ve bir tarafdan Ömer Bey sâkin olduğu menzil ve bir tarafdan Attârzâde Ali Efendi’nin sâkin olduğu menzil ve bir tarafdan tarîk-i âm ile mahdûd olup tûlen ve arzen bi hesâb-ı terbî‘î iki yüz doksan iki buçuk zirâ‘ arsa üzerine mebnî olup tabaka-i ulyâsında dört bâb oda ve bir sofa ve tabaka-i vustâsında üç bâb oda ve altında bir ahır ve bir mutfak ve bahçe ve içinde bir sofa ve bir sagīr havuz ve köşk ve bir sagīr kahve odası ve avlu ve iki kenîfi müştemil menzilden hissem olan bir sehmin hakk-ı tasarrufunu izn-i mütevellî ile yüz guruş bedel mukābelesinde ferâğ ve tefvîz anlar dahi ber vech-i muharrer iştirâ ve tefevvüz ve kabûl eyledi ba‘de’l-yevm evvelâ zikr olunan menzilin üç sehimden bir sehmi mûmâ-ileyh hâfız Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun ve sâniyen zikr olunan menzilin dahi üç sehimden bir sehmi hakk-ı müfevvezidir, emsâli gibi mutasarrıf olsun dedikde mûmâ-ileyh hâfız Mustafa Efendi zimmetinde olan semen-i mezkûr dört yüz yetmiş guruş ile bedel-i merkūm yüz guruş [9a] min haysi’l-mecmû‘ beş yüz yetmiş iki guruşu kendilere hibe-i sahîha-i şer‘iyye ile hibe eyledim, mûmâ-ileyh Mustafa Efendi dahi meclis-i ma‘kūd-ı mezbûrda ittihâb ve kabûl eyledi dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Veli Beşe b. Halil ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Abdurrahman Efendi b. Hanefi el-İmâm, İbrahim Bey b. Mehmed, Mehmed Efendi b. Hüseyin el-İmâm bi câmi‘-i Defterdâr Mahmud, Osman Bey b. Ömer, Sefer b. Mehmed, İbrahim b. Ahmed, Mustafa Efendi b. Musa, İbrahim Çelebi b. Muslu, Hüseyin b. Mehmed.