İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 86 Hüküm no: 26 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime Hâtun’un Abdüsselâm Çelebi’ye borcu olduğunu itiraf ettiği Mahmiye-i İstanbul’da Ali Paşa-yı Atîk mahallesinde sâkin Abdüsselâm Çelebi b. İshak nâm kimesne tarafından husûs-ı âti’l-beyâna vekîl olduğu yedinde mazmûnu müsbit hüccet ile sâbit olan bâ‘is-i hâzihi’l-vesîka Musa Çelebi b. Yakub nâm kimesne meclis-i şer‘-i şerîf-i enverde Kızılminâre mahallesinde sâkine olup zâtı ma‘rifet-i şer‘iyye ile ârifân Ömer b. Ali ve Mehmed b. Abdullah nâm kimesneler ta‘rîfleri ile mu‘arrefe olan Kerime bt. Mehmed nâm hâtun mahzarında bi’l-vekâle üzerine da‘vâ ve takrîr-i kelâm edip yedimde olan işbu temessük nâtık olduğu üzre müvekkil-i mezbûr Abdüsselâm Çelebi’nin mezbûre Kerime Hâtun zimmetinde bundan akdem yedinden iştirâ ve kabz eylediği beynlerinde ma‘lûm kalem bahâsından üç yüz seksen beş esedî guruş ve kezâlik yedinden müşterâ ve makbûzu beynlerinde ma‘lûm al kutnî ve sarık ve havlu makrama bahâlarından dahi yirmi esedî guruş ve mezbûre Kerime’nin emri ile dâyini bostancı Mustafa nâm kimesneye kendi malından def‘ ve teslîm eylediği otuz esedî guruş min haysi’l-mecmû‘ dört yüz otuz beş kıt‘a esedî guruş hakkı olmağla suâl olunup meblağ-ı mezbûr dört yüz otuz guruşun mezbûre Kerime Hâtun’dan alıverilmesi bi’l-vekâle matlûbumdur dedikde gıbbe’s-suâl mezbûre Kerime Hâtun cevâbında fi’l-hakīka kaziyye bâlâda tafsîli mürûr ettiği vech üzre olup müvekkil-i mezbûr Abdüsselâm Çelebi’ye ber vech-i muharrer dört yüz otuz beş esedî guruş zimmetinde vâcibü’l-edâ lâzımü’l-kazâ deyni olduğu[nu] bi’t-tav‘i’s-sâf ikrâr ve i‘tirâf etmeğin mûcebiyle meblağ-ı mezbûr dört yüz on guruş esedî guruşu vekîl-i mezbûr Musa Çelebi’ye edâ ve teslîme merkūme Kerime Hâtun tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Ömer Efendi b. Mustafa, Hüseyin b. el-Hâc Mehmed, Ömer b. Musa, Mehmed b. Ali, Mehmed Efendi el-Kâtib, İbrahim Çelebi el-Muhzır ve gayruhüm.