İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 89 Hüküm no: 29 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hüseyin’in ölen annesinin mirasından hissesine düşen para hususunda Receb b. Veli ile anlaştığı Vilâyet-i Anadolu’da İznikmid kazâsına tâbi‘ Kandıra nâm karyede Orta mahallede sâkin Mehmed b. Hüseyin nâm kimesne meclis-i şer‘de, Receb b. Veli nâm kimesne mahzarında ikrâr ve takrîr-i kelâm edip târih-i kitâbdan dört sene mukaddem vâlidem Ayşe bt. Himmet nâm hâtun mezbûr Receb’in zevcesi iken vefât edip verâseti bize münhasıra olmağla terekesi beynimizde taksîm olunup lâkin müteveffât-ı mezbûrenin mehr-i müecceli olan beş yüz akçe merkūm Receb’in zimmetinde bâkī kalıp meblağ-ı mezbûr beş yüz akçeden hisse-i şer‘iyyem olan üç yüz yetmiş akçeyi mezbûr Receb’den da‘vâ ve taleb ettiğimde ol dahi edâdan imtinâ‘ etmeğin beynimizde ba‘de’n-nizâ‘ muslihûn tavassut edip mezbûr Receb ile beynimizde iki yüz yirmi akçe üzerine inşâ-i akd-i sulh eylediklerinde [ben] dahi sulh-i mezbûru kabûl ve bedel-i sulh olan meblağ-ı mezbûr iki yüz yirmi akçemi mezbûr Receb yedinden tamâ[men] ahz u kabz eylediğimden sonra tereke-i mezbûreye ve meblağ-ı mezbûra müte‘allika âmme-i da‘vâdan merkūm Receb’in zimmetini ibrâ’-i âmm-ı kātı‘ü’n-nizâ‘ ve’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Attâr Hacı Şaban, bakkal Mustafa Beşe, Odabaşı Ziya, İbrahim Çelebi b. Ahmed