İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 90 Hüküm no: 30 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Receb b. Veli’nin evini Receb Ağa’ya sattığı Mahrûse-i Galata müzâfâtından kasaba-i Kasımpaşa mahallâtından Câmi‘-i Kebîr mahallesi sâkinlerinden el-Hâc Receb b. Veli nâm kimesne meclis-i şer‘-i hatîr-i lâzımü’t-tevkīrde bâ‘is-i hâze’l-kitâb Receb Ağa b. Bayram nâm kimesne tarafından husûs-ı âti’l-beyâna vekîli olduğu bimâ hüve nehci’s-sübût şer‘an sâbit olan Osman Çelebi b. Ali nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Ümmühâni bt. Kadri Kapudan veresesi mülkleri ve bir tarafdan Kemal mülkü ve bir tarafdan [tarîk-i] âm ile mahdûd [9b] iki bâb fevkānî [ve] tahtânî odaları ve bir mahzeni ve bir kileri ve tarîk-i âm tarafından dört bâb ve tahtânî ve bi’r-i mâ’lı ve hadîkalı ve iki kenîfi müştemil mülk menzilimi, cemî‘ tevâbi‘ ve levâhık ve kâffe-i menâfi‘ ve merâfıkı ile müvekkil-i mezbûr Receb Ağa’ya tarafından îcâb ve kabûlü hâvî bey‘-i bâtt-ı sahîh-i şer‘î ile beş yüz kıt‘a esedî guruşa bey‘ ve teslîm ol dahi vech-i meşrûh üzre iştirâ ve kabz ve tesellüm ve kabûl eyledikden [sonra] semeni olan meblağ-ı mezbûr beş yüz kıt‘a esedî guruşu bana edâ ve teslîm ben dahi mezbûr Receb Ağa yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı merkūm mezbûr Receb Ağa’nın mülk-i müşterâsı ve hakk-ı sarfı olmuşdur, keyfe mâ yeşâ’ ve yahtâr mutasarrıf olsun [dedikde] gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Ömer Efendi b. Ahmed el-İmâm, Ramazan Halîfe b. el-Hâc Abdullah el-Müezzin, Mehmed Beşe b. Hüseyin, Mehmed Çelebi b. Muslu, el-Hâc Ali b. Mehmed, Süleyman Çelebi b. Hasan, Süleyman Çelebi b. Receb, Receb b. Mustafa, Derviş Çelebi b. Mirza, Mehmed Çelebi b. ( ), el-Hâc Mustafa Çelebi b. Tevekkül, İbrahim Çelebi b. Mehmed ve gayruhüm mine’l-hâzırîn.