İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 107 Hüküm no: 47 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Çelebi b. İbrahim’in Ali Efendi b. Mürsel’e borcu olduğunu kabul ettiği Mahmiye-i İstanbul’da Mahmud Paşa kurbunda Serv[i] mahallesi sâkinlerinden bâ‘is-i hâze’l-kitâb mefharü erbâbü’t-tahrîr ve’l-kalem Ali Efendi b. Mürsel dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde Halil Çelebi b. İbrahim nâm kimesne mahzarında üzerine da‘vâ ve takrîr-i kelâm edip bin seksen altı senesi Recebi gurresinde mezbûr Halil Çelebi yedimden beş yüz esedî guruş iktirâz ve kabz etmekle meblağ-ı mezbûr zimmetinde bana deyni olmağın mezbûr Halil Çelebi’nin halası olan gâ’ibe ani’l-meclis Belkıs bt. Süleyman nâm hâtun mahmiye-i mezbûrede Demirtaş mahallesinde vâki‘, merhûme Hatice Hâtun ve Harameyn-i şerîfeyn ve Samanveren vakıflarından olan bir birine muttasıl üç kıt‘a arsa üzerine mu‘accelelerine mahsûb olmak üzre [binâ] ettiği hâriciyyesinde fevkānî iki bâb oda ve iki sofa ve tahtında dört dükkân ve dâhiliyyesinde fevkānî iki bâb oda ve iki sofa ve tahtânî iki mutfak ve bir kiler ve bir sofa kapısı ve zât-ı eşcâr hadîkayı müştemil menzilini, meblağ-ı mezbûr mukābelesinde rehin mesâbesinde olmak üzre mütevellîler izinleri ile bi tarîki’l-hıyâr bana ferâğ ve tefvîz ben dahi ber vech-i muharrer tefvîz ve kabûl etmiş idim hâlâ mezbûr Halil’e suâl olunup meblağ-ı mezbûr beş yüz guruşu bana edâ ve teslîme tenbîh olunmak matlûbumdur dedikde gıbbe’s-suâl mezbûr Halil Çelebi cevâbında kaziyye minvâl-i muharrer üzre olup meblağ-ı mezbûr beş yüz guruşu müdde‘î-i merkūm yedinden iktirâz ve kabz edip zimmetinde müdde‘î-i merkūm Ali Efendi’ye vâcibü’l-edâ ve lâzımü’l-kazâ deyni olduğunu ikrâr etmeğin mûcebince meblağ-ı mezbûr beş yüz guruşu müdde‘î-i merkūm Ali Efendi’ye edâ ve teslîme merkūm Halil Çelebi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Mefharü erbâbü’t-tahrîr ve’l-kalem Hasan Efendi tezkire-i ûlâ, Kıdvetü erbâbü’t-tastîr ve’l-kalem Yusuf Efendi tezkire-i sâniye, Mefharü’l-emâsil ve’l-a‘yân muhzır Kasım Ağa, hâlâ çavuşbaşı Murad Ağa, Ali Efendi b. Mustafa.