İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 105 Hüküm no: 46 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdüsselâm Efendi’nin Mehmed Ağa’daki alacağı için Musa b. Yakub’u vekil tayin ettiğinin anlaşıldığı Mahmiye-i İstanbul’da Ali Paşa mahallesi ahâlîsinden Abdüsselâm Efendi b. İshak nâm kimesne tarafından husûs-ı âti’l-beyâna ber vech-i âtî vekâlet iddi‘â eden bâ‘is-i hâze’l-kitâb Musa b. Yakub nâm kimesne meclis-i şer‘de, Mehmed Ağa b. Abdüllatîf nâm kimesne mahzarında bi’l-vekâle üzerine da‘vâ ve takrîr-i kelâm edip müvekkilim mezbûr Abdüsselâm Efendi’nin mezbûr Mehmed Ağa zimmetinde beynlerinde ma‘lûm Yusuf nâm gulâm semeninden iki yüz elli guruş ve mezbûr Mehmed Ağa müvekkilim mezbûr yedine def‘ ve teslîm ettiği hat ve hatmi hâvî ve târih-i kitâb şehrinin yedi[nci] günü ile müverrah temessükü mûcebince müvekkilim mezbûr yedinden iktirâz ve kabz ettiği üç yüz elli beş guruş ve bir def‘a dahi yirmi beş guruşu, cem‘an altı yüz otuz guruş hakkı olmağla meblağ-ı mezbûru ve yedine bi tarîki’l-âriye teslîm ettiği kahve rengi çukaya kaplı sansar boğazı kürkü taleb ve da‘vâ ve ahz u kabza ve kendiye îsâle ve kabz ve îsâl mütevakkıf olduğu umûrun küllîsine merkūm Abdüsselâm Efendi tarafından beni vekîl ve nâib-i menâb nasb ve ta‘yîn edip ben dahi vekâlet-i mezbûreyi kabûl etmeğin hâlâ mezbûr Mehmed Ağa’ya suâl olunup müvekkilim mezbûr Abdüsselâm Efendi yedinden iştirâ ve kabz ettiği beynlerinde ma‘lûm Yusuf nâm gulâm semeninden hakkı olan iki yüz elli guruş ve zikr olunan temessükü mûcebince iktirâz ve kabz ettiği üç yüz elli beş guruş ve bir def‘a dahi yirmi beş guruş ve bi tarîki’l-âriye yedine teslîm ettiğini zikr olunan sansar boğazı kürkünü bana def‘ ve teslîme mezbûr Mehmed Ağa’ya tenbîh olunmak matlûbumdur dedikde gıbbe’s-suâl mezbûr Mehmed Ağa cevâbında mezbûr Abdüsselâm Efendi’ye bundan akdem deynim ancak zikr olunan gulâm semeninden iki yüz elli guruş ve cihet-i karzdan yirmi beş guruş ve bir samur paçası kürk semeninden seksen guruş, cem‘an üç yüz elli beş guruş olmağla târih-i mezbûr ile müverrah mârrü’z-zikr temessükü mezbûr Abdüsselâm Efendi’ye verdiğimden sonra mârrü’z-zikr samur paçası kürkü mezbûr Abdüsselâm Efendi’ye teslîm ol dahi ahz u kabz etmiş idi deyip ve bi tarîki’l-âriye zikr olunan sansar boğazı kürkü yedinden ahz u kabz ettiğini ikrâr, lâkin müdde‘î-i mezbûrun vekâletini ve meblağ-ı mezbûr üç yüz elli beş guruşu iktirâz ve kabz ettiğini inkâr edicek müdde‘î-i mezbûrdan evvelâ vekâleti için beyyine taleb olundukda udûl-i ricâl-i müslimînden olup zikr olunan Ali Paşa mahallesi ahâlîsinden Müezzin Ömer Efendi b. Mustafa ve Ömer Çelebi b. Maden ve Hüseyin Bey b. el-Hâc Mehmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Abdüsselâm Efendi mezbûr Mehmed Ağa’nın zimmetinde hakkı olan meblağları ve zikr olunan sansar boğazı kürkü taleb ve da‘vâ ve ahz u kabz ve kendiye îsâle ve kabz ve îsâl mütevakkıf oduğu umûrun küllîsine tarafından müdde‘î-i mezbûr Musa’yı bizim huzûrumuzda vekîl edip mezbûr Musa dahi vekâlet-i mezbûreyi kabûl eyledi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup ve sâniyen mezbûr Mehmed Ağa müvekkil-i mezbûr Abdüsselâm Efendi’den üç yüz elli beş guruşu iktirâz ve kabz eylediğine beyyine taleb olundukda ityân için istimhâl etmekle mehl-i şer‘î ile imhâl olundukdan sonra mezbûr Mehmed Ağa’nın ikrârı mertebesi olan meblağ-ı mezbûr iki yüz yetmiş beş guruş ve zikr olunan kahve rengi çukaya kaplı sansar boğazı kürkü müdde‘î-i mezbûre teslîme mezbûr Mehmed Ağa tenbîh olunup mâ vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li sene seb‘a ve semânîn ve elf. Şuhûdü’l-hâl: Hasan Çelebi b. Abdülmuttalib, İbrahim Çelebi b. Mehmed, Hüseyin Bey b. el-Hâc Mehmed, Ömer b. Maden.