İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 108 Hüküm no: 49 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ali’nin câriyesi Şahbaz’ı azat ettiği Mahmiye-i İstanbul’da Hızır Bey mahallesinde sâkine olup zâtı ma‘rifet-i şer‘iyye ile ârifân mahalle-i mezbûre sükkânından Ali b. Mehmed ve Hasan b. Sefer nâm kimesneler ta‘rîfleri ile mu‘arrefe olan Fâtıma bt. Ali nâm hâtun meclis-i şer‘-i şerîf ve mahfil-i dîn-i münîfde ikrâr ve takrîr-i kelâm edip bana rıkkıyyetini mu‘terife işbu orta boylu açık kaşlı sarı ala gözlü Rûsiyyetü’l-asl bâ‘isetü hâze’l-kitâb Şahbaz bt. Abdullah nâm câriyemi hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk malımdan tahrîr ve i‘tâk ve zümre-i harâir-i asliyyâta idrâc ve ilhâk eyled[im] ba‘de’l-yevm mevsûfe-i mezbûre Şahbaz sâir harâir-i asliyyât gibi hürre olup üzerinde velâ’-i şer‘îden gayrı hakkım kalmadı dedikde mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn mine’l-Muharremi’l-harâm li sene seb‘a ve semânîn ve elf. Şuhûdü’l-hâl: İbrahim b. Mustafa, Mehmed b. Şaban, Hasan b. Sefer, Veli Bey b. Mahmud, Mustafa Çelebi el-kantârî, Hüseyin Beşe terzi, Mehmed Çelebi b. ( ) terzi ve gayruhüm.